2020 yilda 32ta madaniyat obekti mahalliy hokimiyatlar tomonidan sotib yuborilgan

2020 yilda Qoraqalpog‘iston Respublikasi va Surxondaryo viloyatida 8tadan, Farg‘ona viloyatida 13ta, Toshkent shahrida 3ta madaniyat obekti Madaniyat vazirligi bilan kelishilmagan holda mahalliy hokimliklar tomonidan balansiga o‘tkazilib, sotuvga qo‘yib, sotib yuborilgan. Bu haqda madaniyat vaziri Ozodbek Nazarbekov ma'lum qildi.

Uning Axborot va ommaviy kommunikatsiyalar agentligida o‘tkazilgan brifingda aytishicha, «Madaniy faoliyat va madaniyat tashkilotlari to‘g‘risida»gi qonun boshqa idora va tashkilotlar bilan munosabatlarni aniq belgilab beryapti. Bundan keyin shu kabi muammolarda endi vazirlikning aniq pozitsiyasi shakllanadi.

«O‘tgan yilda eng muhim, biroq amalga oshmay qolgan masalalardan yana biri haqida to‘xtalsam. 2020-2021 o‘quv yilidan boshlab, notalar to‘plami va maxsus musiqiy adabiyotlarni chop etish hamda ularning ta'lim muassasalariga to‘liq yetkazilishini ta'minlash rejalashtirilgan edi.

Vazirlik tomonidan notalar to‘plamlari va maxsus musiqiy adabiyotlar loyihalari tayyorlandi, lekin moliyaviy manbasi aniqlanmagani uchun 2020 yilda bu vazifa bajarilmay qoldi. Kuni kecha Vazirlar Mahkamasida bo‘lib o‘tgan muhokamalarda bosh vazir Moliya vazirligiga topshiriq berdi, bu yil ushbu muammolarni ham bosqichma-bosqich hal qilamiz», - dedi vazir.