Senat Markaziy saylov komissiyasining yangi a’zolarini tasdiqladi

Oliy Majlis Senatining o‘n ikkinchi yalpi majlisida O‘zbekiston Respublikasi Markaziy saylov komissiyasining tarkibiga o‘zgartishlar kiritish to‘g‘risidagi masala ko‘rib chiqildi.

• Senat a’zolari Qarshi muhandislik-iqtisodiyot instituti rektori Orifjon Shodiyevich Bozorov;
• «Navoiyazot» aksiyadorlik jamiyati ijtimoiy va maishiy masalalar bo‘yicha bo‘lim boshlig‘i Shuhrat Nizomovich Jo‘rayev;
• O‘zbekiston sog‘liqni saqlash xodimlari kasaba uyushmasi Respublika Kengashining Surxondaryo viloyati bo‘yicha mas’ul tashkilotchisi Muyassar Jumayevna Qodirova;
• O‘zbekiston Respublikasi adliya vazirining o‘rinbosari Bahrom To‘lqinovich Ko‘chqorov;
• O‘zbekiston Respublikasi Oliy Majlisi Senati Raisining o‘rinbosari Zayniddin Mahamatovich Nizomxo‘jayev;
• Jizzax politexnika instituti rektori Alisher Qodirqulovich Usmonqulov;
• «O‘zelektroapparat» AJ boshqaruvi raisi maslahatchisi Aleksandr Qosimovich Farmonov;
• Xorazm viloyati kasaba uyushmalari tashkilotlari birlashmasi kengashi raisi Ergash Omonbayevich Yusupovni O‘zbekiston Respublikasi Markaziy saylov komissiyasining a’zolari etib saylash to‘g‘risida qaror qabul qildi.

Shuningdek, ushbu qaror bilan O‘zbekiston Respublikasi Markaziy saylov komissiyasining a’zolari M.E. Abdusalomov, O.Bobojonov, M.A.Jo‘rayeva, J.X.Norov, E.Rajabov, J.Sodikov va E.Xo‘jaqulovning vakolatlari tugatildi. 

OAV ma’lumotiga ko‘ra, endilikda Markaziy saylov komissiyasiga Zayniddin Nizomxo‘jayev rais bo‘ladi, Bahrom Qo‘chqorov unga o‘rinbosarlik qiladi.

3 fevral kuni Qonunchilik palatasi MSKning 8 nafar yangi a’zolari nomzodini ko‘rib chiqqani va ma’qullagani haqida xabar berilgandi.

Bugun Senat yalpi majlisi davomida Markaziy saylov komissiyasining sobiq raisi Mirzo-Ulug‘bek Abdusalomov Konstitutsiyaviy sud sudyasi etib saylandi.