«Uyjoyfondinspeksiya»ga noqonuniy qurilmalar yuzasidan to‘g‘ridan to‘g‘ri fuqarolik sudlariga da'vo arizalari kiritish huquqi beriladi 

Vazirlar Mahkamasining “O‘zboshimchalik bilan qurilgan imoratni aniqlash hamda bartaraf etish (buzib tashlash)ni tashkil etish tartibi to‘g‘risidagi nizomga qo‘shimchalar kiritish haqida”gi qarori loyihasi e'lon qilindi.

Qayd etilishicha, Uy-joy kommunal xizmat ko‘rsatish vazirligi huzuridagi Ko‘p xonadonli uy-joy fondidan foydalanishni nazorat qilish inspeksiyasi (“Uyjoyfondinspeksiya”) ko‘p kvartirali uy-joy fondini saqlab turish va ulardan foydalanish sohasida vakolatli organ hisoblanib, uning zimmasiga ko‘chmas mulk egalarining binolarni o‘zboshimchalik bilan o‘zgartirishiga yo‘l qo‘ymaslik choralarini ko‘rishga oid vazifalar yuklatilgan.

Bildirilishicha, bugungi kunda “Uyjoyfondinspeksiya” respublikadagi 1,2 mln.dan ortiq xonadon joylashgan 37,0 mingdan ziyod ko‘p kvartirali uylarda yashayotgan 5,0 mln.ga yaqin ko‘chmas mulk egalarining uy-joy fondi va unga tutash hududlarni o‘zboshimchalik bilan o‘zgartirishiga yo‘l qo‘ymaslikka oid choralar ko‘rib borish ishlarini amalga oshirmoqda.
 
Amaldagi normativ-huquqiy hujjatlarda “Uyjoyfondinspeksiya”ga ko‘chmas mulk egalarining binolarni o‘zboshimchalik bilan o‘zgartirganlik holatlari bo‘yicha aniqlangan huquqbuzarliklarni faqat majburiy ko‘rsatma berish yoki sudlar orqali bartaraf etish huquqi berilgan. Biroq, fuqarolik ishlari bo‘yicha sudlarga taqdim etilayotgan ushbu mazmundagi materiallar yuzasidan inspeksiya davlat boji to‘lovini amalga oshirmagani aniqlangan noqonuniy qurilmalarni joyida bartaraf etishga salbiy ta'sir ko‘rsatib kelmoqda, deyiladi loyihada.

Yuqorida qayd etilgan muammolarni hal etish, ko‘p kvartirali uylarni saqlash va ulardan foydalanish sohasidagi huquqbuzarliklarning oldini olishga ko‘maklashish yo‘li bilan uy-joy fondlari texnik xavfsizligini ta'minlash ishlarida “Uyjoyfondinspeksiya”ning rolini yanada oshirish maqsadida Vazirlar Mahkamasining 467-sonli qarori bilan tasdiqlangan “O‘zboshimchalik bilan qurilgan imoratlarni aniqlash hamda bartaraf etish (buzib tashlash)ni tashkil etish tartibi to‘g‘risida”gi nizom 4-bandidagi “O‘zboshimchalik bilan qurilgan imoratlarni aniqlash hamda ularni bartaraf etish (buzib tashlash)ni tashkil etish sohasidagi vakolatli davlat organlari ro‘yxati”ga Uy-joy kommunal xizmat ko‘rsatish vazirligi huzuridagi “Uyjoyfondinspeksiya” va uning hududiy inspeksiyalarini ham kiritish zaruriyati tug‘ilayotgani aytiladi.

Ma'lum qilinishicha, Vazirlar Mahkamasining ushbu qarori loyihasidagi takliflar ma'qullanishi “Uyjoyfondinspeksiya”ga noqonuniy qurilmalarni bartaraf etish yuzasidan to‘g‘ridan to‘g‘ri fuqarolik sudlariga da'vo arizalari kiritish huquqini beradi. Shuningdek, aniqlangan huquqbuzarliklarning sud qarorlari asosida bartaraf etilishi ishlarini yanada jadallashtirish orqali joylarda uy-joy fondini saqlash va undan oqilona foydalanish sohasida joy mulkdori shaxsiy mas'uliyatini oshirish yo‘li bilan kelgusida turar joylarning zilzilabardoshligi yo‘qolishi, uylarning tashqi ta'sirlarga chidamsiz bo‘lib qolishi, fuqarolar hayoti, sog‘ligi va moddiy qimmatliklarining xavf ostida qoldirishi oldi olinadi.