Qirg‘iziston prezidenti O‘zbekistonga tashrif buyuradi 

Qirg‘iziston prezidenti Sadir Japarov rasmiy tashrif bilan O‘zbekistonga keladi. Bu haqda Qirg‘iziston tashqi ishlar vazirligi saytida xabar qilingan.

2021 yil 22 fevral kuni videokonferensaloqa shaklida Qirg‘iziston tashqi ishlar vazirining birinchi o‘rinbosari Nuran Niyozaliyev va O‘zbekiston tashqi ishlar vazirining birinchi o‘rinbosari Farhod Arziyev ikki mamlakat o‘rtasidagi qonunchilik bazasining inventarizatsiyasi bo‘yicha muzokaralar o‘tkazdi.

Muzokaralar davomida tomonlar Qirg‘iziston prezidenti Sadir Japarovning O‘zbekistonga rasmiy tashrifiga tayyorgarlik ko‘rish va uni amalga oshirish hamda O‘zbekiston tashqi ishlar vaziri Abdulaziz Komilovning Qirg‘izistonga bo‘lajak amaliy tashrifi mavzusiga alohida e'tibor qaratdilar. 

Sadir Japarovning O‘zbekistonga tashrifi qachon amalga oshirilishi haqida aniq ma'lumot berilmagan. 24 fevral kuni Qirg‘iziston prezidenti Rossiyaga birinchi xorijiy tashrif bilan yo‘l oldi.

Bundan tashqari, vazir o‘rinbosarlari ikki tomonlama hamkorlikning dolzarb yo‘nalishlari va istiqbollari to‘g‘risida fikr almashdi, mintaqaviy va xalqaro tashkilotlar doirasida o‘zaro aloqalarni yanada mustahkamlash masalalarini muhokama qildi.