Toshkentda chiqindilarni saralagan holda to‘plash tajribasi 24ta mahallada joriy etiladi

Qayd etilishicha, Toshkentda to‘planadigan chiqindilar yildan yilga oshib bormoqda va prognozlarga ko‘ra, 15 yildan keyin uning hajmi ikki barobar oshadi. Ushbu vaziyatda yagona yechim – chiqindilarni qayta ishlash bo‘lib, buning uchun uni saralash lozim. 2019 yilda Yakkasaroy tumanidagi mahallalardan birida chiqindilarni saralab, to‘plash bo‘yicha birinchi loyiha amalga oshirildi. 

Prezidentning 2020 yil 15 dekabrdagi “Toshkent shahrida maishiy va qurilish chiqindilari bilan bog‘liq ishlarni amalga oshirishni takomillashtirish chora-tadbirlari to‘g‘risida”gi PQ-4925 sonli qaroriga muvofiq, qattiq maishiy chiqindilarni (QMCh) to‘plash, saralash va olib chiqib ketish xizmatlarini tashkil etish sohasida xususiy sektor ulushini 100 foizga yetkazish ko‘zda tutilgan. 

Joriy yilda QMChni saralagan holda to‘plash har bir tumandagi ikkita mahallada – jami 24ta mahallada joriy etiladi. Ushbu mahallalar aholisiga rangli paketlar beriladi. Sariq paketlar – qayta ishlanadigan chiqindilar (qog‘oz va plastik), yashil paketlar – organik chiqindilar (oziq-ovqat qoldiqlari, barglar, o‘tlar), kulrang paketlar esa qayta ishlanmaydigan chiqindilar (oyoq kiyimlari, salfetkalar, pamperslar) uchun mo‘ljallangan.

Chiqindilarni olib ketish uchun haftasiga ikki marotaba rangli yashil va kulrang-sariq stikerli mashinalar keladi (yozda ko‘proq keladi). Ushbu maqsadda “Maxsustrans” OTTB grant mablag‘lari hisobidan 59ta yangi maxsus mashinalarni xarid qildi va ularga hozirgi kunda stikerlar yopishtirilmoqda. Saralagan holda chiqindilarni yig‘ishni rag‘batlantirish maqsadida oilalarga QMChni olib chiqish uchun to‘lov tarifi pasaytiriladi.

Tajriba uchun tanlangan mahallalar aholisiga QMChni saralash zaruriyati haqidagi axborotni yetkazish tadbirlari ko‘rib chiqilmoqda. Maktablar va mahalla qo‘mitalarida ma'ruzalar, darslar, konsertlar va kichik hasharlar tashkil etilishi kutilmoqda.