So‘nggi yillarda Rossiya hukumatining asosiy tanqidchisi bo‘lgan siyosatchi o‘ldirilgan kunda uni xotirlab minglab kishilar ishtirokida marsh o‘tkazilardi, ammo bu yili Moskva rasmiylari marsh o‘tkazishga ruxsat bermadi, buni pandemiya munosabati bilan joriy etilgan cheklovlar bilan izohlashdi. An'anaviy marshlar tashkilotchilari meriyaga ko‘prikka guldastalar qo‘yish marosimiga xalal bermaslik bo‘yicha iltimos bilan chiqishdi.
Moskvoretskiy ko‘prigidagi qotillik joyiga kun davomida odamlar guldastalar ko‘tarib kelishdi. Shu jumladan, G‘arb davlatlari elchilari marhum siyosatchini xotirlashdi.
Siyosatchining do‘stlari, yaqinlari va tarafdorlari uning Troyekurovskoye qabristonidagi qabriga ham gullar qo‘yishdi.
«Oq hisoblagich» («Beliy schyotchik») tashkiloti vakillari ma'lumotiga ko‘ra, Moskva vaqti bilan soat 17:30da Boris Nemsovni xotirlash uchun Moskvoretskiy ko‘prigiga kelganlar soni 8 mingga yaqinni tashkil etgan.
Yuliya Navalnaya ham siyosatchini xotirlash uchun keldi. U jurnalistlar bilan suhbatlashishni rad etdi.
Nemsovning safdoshi Ilya Yashin siyosatchini xotirlash uchun kelmoqchi bo‘lganlardan ko‘prikka plakatlarsiz kelishni so‘radi va bu miting yoki marsh emas, «xotira marosimi» ekanini eslatdi. «Politsiyaga qo‘lga olish uchun sabab qoldirmaslik kerak», degan Yashin.
Memorialga «Yabloko» partiyasi asoschisi Grigoriy Yavlinskiy, shuningdek, «Parnas» partiyasi yetakchisi, Rossiyaning sobiq bosh vaziri Mixail Kasyanov ham keldi.
Nemsovning qotilligi ro‘y bergan joyda o‘rnatilgan yodgorlikda ko‘ngilliklar navbatchilik qilishdi. Memorial OAVda «Nemsov ko‘prigi» deb ataladi.
Nemsovning qotilligi yodga olinishiga oz vaqt qolganida, 19 fevral kuni politsiya memorialni o‘rab oldi va gullar hamda fotosuratlarni olib tashladi. Shuningdek, bu yerda navbatchilik qilayotganlar qo‘lga olindi.
