«Bir maktabga to‘rttalab karnay, nog‘oralar berilgan, chaladigan odam yo‘q» - Baxtiyor Sayfullayev

Qo‘mita raisi Baxtiyor Sayfullayev maktablarda sport zallari holati, musiqa asboblari olib berish bilan bog‘liq tushunarsiz holatlar haqida vazirlik va idoralar ishini tanqid qildi.

«Madaniyat markazlari binolari juda achinarli ahvolda. Masalan, bir madaniyat markazi binosi yo‘q, lekin shtati mavjud. Ular qayerda o‘rgatyapti — maktabda. Nega egasi bor joylarga kirib boryapmiz, maktabning egasi bor-ku, o‘z to‘garagi bor, ichi bo‘sh bo‘lsa ham sport zali bor. Hali sport zalni anjomlar bilan to‘ldirish, musiqa asboblari olib berish kerak.

Bundan tashqari, kutubxonalar moslashmagan. Tumanlarda kutubxona bo‘lmagani uchun kitobxonlikni maktablarga o‘tkazdik, deyishyapti. Bir maktab kutubxonasini kirib ko‘rdik, hech narsa yo‘q. Bizni aldash uchun bir sinf bolalarini o‘tqazib qo‘yibdi, darsdan keyin kutubxonada o‘tirib tez aytish mashq qilyapti, deydi. Kutubxona tez aytish o‘ynaydigan joy emas, kitob mutolaa qiladigan joy. Kitob yo‘q, mahalla kirmaydi bu yerga.

Biz hozir madaniyat va sport orqali yoshlarni qamrab olishimiz kerak. Bu joriy yil dasturida ham turibdi. Shunga binoan xalqimizning 17-25 foizi sport bilan shug‘ullanishini ta'minlab berishimiz kerak.

Ommaviy tadbirlar bo‘yicha har bir hokimlik 350 mln so‘mdan 500 mln so‘mgacha moliyaviy ta'minlab berishi kerak, nega shuni hokimlardan talab qilmaysiz yoki Senatga chiqib, hokimiyat pulni chiqarib bermayapti, deb aytmaysiz? Aybingiz shuki, hozir befarq qarab turibsiz», dedi qo‘mita raisi Baxtiyor Sayfullayev Madaniyat vazirligi va Sport vazirligi vakillariga.

Shundan so‘ng, Baxtiyor Sayfullayev Sirdaryo viloyatiga safari davomida duch kelgan voqea haqida so‘zlab berdi.

«Menga bir bo‘lim mudiri kimga aytishimni bilmayapman, vazirlik 4ta karnay, 4ta nay berdi, lekin mutaxassisning o‘zi yo‘q. Nog‘oralar bergan, bitta tumanga 1ta yetadi, lekin nog‘orachi ham yo‘q. Nima qilaman uni, deydi. Ko‘rib chiqdik, aytganiday turibdi, bunga e'tibor qilish kerak», dedi qo‘mita raisi Baxtiyor Sayfullayev.