Qoʻshimcha funksionallar
-
Tungi ko‘rinish
Red Wings Rossiyadan O‘zbekistonga aviareyslarni yo‘lga qo‘yishi mumkin
Red Wings Rossiyaning SSJ 100 samolyotlarida Yekaterinburg va Chelyabinskdan O‘zbekiston shaharlariga parvozlarni boshlash imkoniyatlarini o‘rganmoqda.
Rossiya Sanoat va savdo vazirligi rahbari Denis Manturov Red Wings aviakompaniyasi SSJ 100 samolyotlarida Yekaterinburg va Chelyabinskdan O‘zbekistonning asosiy shaharlariga parvozlarni boshlash imkoniyatini o‘rganayotganini ma'lum qildi, deb xabar bermoqda TASS.
«Red Wings Yekaterinburg va Chelyabinskdan O‘zbekistonning asosiy shaharlariga, shu jumladan respublika poytaxti Toshkentga parvozlarni yo‘lga qo‘yish imkoniyatini ko‘rib chiqmoqda», deya ta'kidlagan Manturov.
Shuningdek, Rossiya sanoat va savdo vaziri «Innoprom» ko‘rgazmasida aviakompaniya rahbariyati va O‘zbekiston aviatsiya ma'murlari o‘rtasida tegishli muzokaralar olib borilganini keltirib o‘tdi.
Denis Manturov so‘zlariga ko‘ra, reyslarni ochish havo qatnovini tiklash va Rossiya transport vazirligi tomonidan ma'lum yo‘nalishlar uchun ruxsatnomalar berilishiga bog‘liq bo‘ladi.
«Ayni paytda Red Wings parkida 4ta SSJ 100 samolyoti mavjud, aprel oyi oxirida parvozlarni boshlaydigan yana uchta laynerning texnik qabul qilinishi yakunlanadi», - degan Manturov.
Ma'lumot uchun, 5 aprel kuni prezident Shavkat Mirziyoyev «Innoprom» xalqaro sanoat ko‘rgazmasida ishtirok etish uchun Toshkentga tashrif buyurgan Rossiya sanoat va savdo vaziri Denis Manturov boshchiligidagi delegatsiyani qabul qildi.
Avvalroq, 7 aprel kuni Uzbekistan Airways 2021 yilning aprel oyidan boshlab, Toshkent - Moskva - Toshkent yo‘nalishi bo‘yicha muntazam aviaqatnovlar qayta joriy etilishi to‘g‘risida xabar berdi.
