Sirdaryoda Qashqadaryodan olib kelinayotgan 329 kg iste'molga yaroqsiz go‘sht yoqib yuborildi

Sirdaryo viloyatida Qashqadaryodan olib kelinayotgan iste'molga yaroqsiz go‘sht to‘xtatib qolingan va laboratoriya tekshiruvidan so‘ng yoqib yuborilgan. Bu haqda viloyat IIB axborot xizmati xabar bermoqda.

Ma'lum bo‘lishicha, yuqumli kasalliklar tarqalishining oldini olish maqsadida, viloyat hududida faoliyat olib borayotgan «Sirdaryo» karantin maskanida o‘tkazilgan tadbirda Qashqadaryo viloyati Koson tumanida yashovchi J.S. boshqaruvidagi « Nexia» mashinasi tekshirilgan va unda hech qanday hujjatlarsiz olib ketilayotgan 329 kg qoramol go‘shti borligi aniqlangan.

Ushbu go‘sht viloyat Hayvonlar kasalliklari tashxisi va oziq-ovqat mahsulotlari xavfsizligi davlat markaziga olib borilib, laboratoriya tekshiruvlaridan o‘tkazilganda, iste'molga yaroqsiz ekani ma'lum bo‘lgan.

Shundan so‘ng ushbu go‘sht viloyat Veterinariya va chorvachilikni rivojlantirish boshqarmasining tegishli xulosasiga asosan Guliston tumani Zarbdor mahallasi hududida yoqish yo‘li bilan yo‘q qilingan.

Qayd etilishicha, fuqaro J.S. boshqaruvidagi «Nexia» mashinasi tegishli tartibda qonuniy chora ko‘rish uchun Bosh prokuratura huzuridagi Iqtisodiy jinoyatlarga qarshi kurashish Departamentining Sirdaryo viloyati boshqarmasi mas'ul xodimlariga tegishli tartibda topshirilgan.

Avvalroq Qarshi shahrida eshak so‘yib sotib kelgan shaxslar ushlangan edi. Ular faoliyat olib borgan xonadon tekshirilganda 20 bosh tirik eshak va yana ancha eshak go‘shti topilgan edi.