Toshkentda bir guruh ayollar va ichki ishlar xodimlari o‘rtasida mojaro yuz berdi. IIBB rasmiy izoh bilan chiqdi

Qayd etilishicha, 14 aprel kuni taxminan soat 21:30larda Qoratosh va Bunyodkor ko‘chalari kesishmasida Toshkent shahar IIBB patrul-post xizmati xodimlari avtomobillar qatnov qismida farzandlari bilan tilanchilik qilib, haydovchilarga xalaqit bergan uch nafar ayollarni ko‘rib qolishgan.

Bildirilishicha, ayollar tilanchilik qilish ma'muriy huquqbuzarlik hisoblanishi haqida ogohlantirilib, ularning shaxsini aniqlash maqsadida Shayxontohur tumani IIO FMB 2-son ichki ishlar bo‘limiga taklif qilingan.

“Bunga javoban ayollar atrofdagilarning rahmini keltirish uchun baqirib, xodimlarga faol qarshilik qila boshlashdi. Ichki ishlar bo‘limiga olib kelingan shaxslar Samarqand viloyatlik, 25 yoshli, ikki farzandli Mahliyo Yu., 30 yoshli Zuhra Sh. va 25 yoshli Sanobar U. ekani, shuningdek ular muqaddam bir necha marotaba ogohlantirilgani aniqlandi.

Bundan avval xodimlar mazkur ayollarning yo‘l qismida tilanchilik maqsadida bolalaridan foydalanayotganiga guvohi bo‘lishgan. Bu ayollarning yo‘l qatnov qismida tilanchilik qilishi nafaqat ularning o‘zi, balki norasida go‘daklarining hayoti uchun ham xavfli bo‘lib, kamiga boshqa yo‘l harakati qatnashchilari hayoti ham xavf ostida qolgan”, deyiladi ma'lumotda.

Ma'lum qilinishicha, ayollarga nisbatan tegishli hujjatlar rasmiylashtirilib, qonuniy chora ko‘rilishi uchun tergovga qadar tekshiruv o‘tkazilmoqda, natijasi haqida qo‘shimcha xabar beriladi.

Qayd etilishicha, Toshkent shahar IIBB xodimlari tilanchilik uchun javobgarlik kuchaytirilgandan buyon, faol tilanchilik bilan shug‘ullanuvchi shaxslar orasida tushuntirish-profilaktik ishlar olib bormoqda. 

“Profilaktik suhbatlar davomida tilanchilik bilan shug‘ullanish sabablari o‘rganilib, ularga yordam berish uchun ish taklif etilmoqda. Afsuski, ushbu fuqarolar har doim ham ishga joylashishga rozi bo‘lmasdan, yengil daromad topish maqsadida tilanchilik bilan shug‘ullanishda davom etmoqda”, deyiladi IIBB xabarida.