Langarda va'da qilingan «stolbalar» qachon o‘rnatiladi?

Kun.uz saytida «Qishloqda bir kun» ruknida «Tong sahardan o‘tin tergani zovur bo‘yiga — Qo‘shtepaning Langarida o‘tgan bir kun» sarlavhasi ostida maqola e'lon qilingan edi.

Unda Qo‘shtepa tumani Langar mahallasida istiqomat qiluvchi aholining turmush manzaralari, hayoti va kundalik yumushlari aks ettirilgan bo‘lib, qishloqdagi chirib bitgan «stolba»lar, ichimlik suvi hamda tabiiy gaz bilan bog‘liq muammolar atroflicha yoritilgan edi. 

Tandiqiy maqola e'lon qilingandan keyin videolavhada aks etgan «Langar» MFY Mardlik ko‘chasi, 10-uyda yashovchi Shoira Xoliqovaning xonadoniga hokimlik hamda savob umidida bo‘lgan yurtdoshlarimiz tomonidan yordam ko‘rsatildi. Xonadonning ko‘cha devorlari ta'mirlab berildi.

Mahalla ahlining Kun.uz muxbiriga bergan ma'lumotiga ko‘ra, chirib bitgan yog‘och «stolba»ning bittasi o‘sha paytdayoq yangisiga almashtirilgan, lekin tarmoqqa ulanmay qolib ketgan. Mutasaddilar avariya holatida bo‘lgan boshqa yog‘och tayanchlarni almashtirishni negadir paysalga solib kelmoqda.

Vaholanki, o‘sha paytdayoq Qo‘shtepa tumani hokimligi hududga elektr energiya tizimini yaxshilash maqsadida 120 dona tayanch ustun, 120 dona tungi yoritish chirog‘i, 1 dona transformator o‘rnatish, 9,9 km elektr tarmoqlari tortish, aloqa tizimini yaxshilash maqsadida 48 km optik tolali aloqa tarmog‘i tortish va ijtimoiy soha obektlarini ta'mirlash ishlarini bajarish rejalashtirilganini ma'lum qilgan edi.

Kun.uz mazkur holat bo‘yicha Qo‘shtepa tumani hokimligidan izoh kutib qoladi.