Navoiyda viloyat prokuraturasi binosi davlat-xususiy sheriklik asosida quriladi  

Vazirlar Mahkamasining 2021 yil 8 maydagi 292-sonli qarori bilan Bosh prokuratura va Navoiy viloyati hokimligining viloyat prokuraturasi ma'muriy binosini davlat-xususiy sheriklik shartlari asosida qurish va jihozlash to‘g‘risidagi taklifiga rozilik berildi.

Qarorga ko‘ra, ma'muriy binoni qurish va jihozlash uchun xususiy sherikni tanlash bo‘yicha Bosh prokuratura, Moliya vazirligi huzuridagi Davlat-xususiy sheriklikni rivojlantirish agentligi, Navoiy viloyati hokimligi va Navoiy viloyati prokuraturasi vakillaridan iborat ishchi guruh tashkil etiladi.

Bosh prokuraturaga ishchi guruh xulosasi asosida tender o‘tkazmasdan, to‘g‘ridan-to‘g‘ri muzokaralar o‘tkazish orqali xususiy sherik bilan bitim tuzishga ruxsat berildi. 

Ta'kidlanishicha, xususiy sherik Navoiy viloyati prokuraturasiga tegishli, Navoiy shahri, “Yoshlik” MFY hududidagi 3,5 gektar yer uchastkasining 1 gektarida ma'muriy bino qurib, jihozlagan holda Bosh prokuraturaga davlat mulki sifatida bepul topshiradi. Yer uchastkasining 2,5 gektar qismi esa ma'muriy bino qurilib, belgilangan tartibda topshirilganidan so‘ng xususiy sherikka doimiy foydalanish uchun bepul ajratib beriladi.