Eron tashqi ishlar vaziri Avstriya davlat idoralarida Isroil bayrog‘i ko‘tarilgani sababli Venaga tashrifini bekor qildi

Zarif Avstriya tashqi ishlar vaziri Aleksander Shallenberg bilan muzokara olib borish uchun shanba kuni Venaga tashrif buyurishni rejalashtirgandi.

Foto: TASS

Eron tashqi ishlar vaziri Muhammad Javod Zarif Avstriya hukumat binolarida Isroil bayrog‘i ko‘tarilgani sababli Venaga tashrifini bekor qildi. Bu haqda Avstriya matbuot agentligi xabar berdi.

Xabar qilinishicha, Zarif Avstriya tashqi ishlar vaziri Aleksander Shallenberg bilan muzokara olib borish uchun shanba kuni Venaga tashrif buyurishni rejalashtirgandi, ammo u tashrifini bekor qilgan.

"Taassuf bildiramiz va ma'lumot uchun qabul qilamiz", - deyiladi Avstriya TIV bayonotida.

Juma kuni Avstriya kansleri devonxonasi va Avstriya tashqi ishlar vazirligi binolarida G‘azo sektoridagi voqealarda Tel-Aviv bilan birdamlik ramzi sifatida Isroil bayroqlari ko‘tarilgandi.

10 maydan buyon Isroil va Falastin o‘rtasidagi ziddiyat keskinlashdi. Tomonlar bir-birini raketalar yordamida o‘qqa tutmoqda.