Tojikiston Dushanbedagi O‘zbekiston elchixonasi binosining qurilish joyini o‘zgartirdi

Tojikiston hukumati Tojikistonning O‘zbekistondagi va O‘zbekistonning Tojikistondagi diplomatik vakolatxonalari binolarini qurish uchun yer uchastkalarini o‘zaro taqdim etish to‘g‘risida O‘zbekiston bilan imzolangan bitimga o‘zgartirish kiritish haqidagi bayonnoma loyihasini imzolash bo‘yicha topshiriq berdi. Bu haqda “Asia-Plus” xabar qilmoqda.

Tojikiston Adliya vazirligining huquqiy axborot portalida e'lon qilingan bayonnoma loyihasida O‘zbekiston diplomatik vakolatxonasi uchun bino va inshootlarni qurishga binolar va tranzit kommunikatsiyalaridan xoli yer uchastkasi berilishi aytilgan. 

Umumiy maydoni 1,2 gektarni tashkil etadigan yer uchastkasi Sino tumanidagi Nusratullo Maxsum shohko‘chasi bo‘ylab joylashgan. 

Yer uchastkasi 49 yil davomida O‘zbekiston hukumati ixtiyorida bo‘ladi, ijara narxi - 1 dollar. 

Avvalroq, ikki mamlakat hukumatlari o‘rtasida 2018 yil avgust oyida tuzilgan shartnomaga muvofiq, O‘zbekiston elchixonasi uchun Dushanbening Abu Ali ibn Sino shohko‘chasida yer uchastkasi taklif qilingan edi. 

Shartnomaga binoan, Tojikistonning Toshkentdagi elchixonasini qurish uchun Tojikiston hukumati Zulfiyaxonim va Sebzor ko‘chalari kesishmasidan yer uchastkasini oladi. Tojikistonning Toshkentdagi elchixonasini joylashtirish rejalashtirilgan hudud Sebzor dahasida joylashgan. 

Hozirda O‘zbekistonning Dushanbedagi elchixonasi Sanoiy ko‘chasida, Tojikistonning Toshkentdagi elchixonasi esa Abdulla Qahhor ko‘chasida joylashgan.