DW xabariga koʻra, Britaniyaning The Guardian gazetasi 2-oktabr kuni soʻnggi kunlarda Kiyevga hujumlar koʻpaygani sababli diplomatik vakolatxonalarni boshqa joyga koʻchirish rejalari tayyorlanayotganini yozgan.

«Rossiya Kiyevni muzlatib, uni tosh davriga qaytarishni rejalashtirmoqda. Vaziyat, shubhasiz, tez yomonlashyapti», - degan nashr suhbatlashgan diplomatlardan biri.

Xabarda gap elchixonalar allaqachon koʻchirilgani haqida emas, ehtimoliy koʻchishga tayyorgarlik haqida bormoqda.

Diplomatlar nega Kiyevda qolishni muhim deb hisoblamoqda?

The Guardianʼning yozishicha, Gʻarb diplomatlari ommaviy bayonotlarida Kiyevda ishlashni davom ettirish niyatini taʼkidlamoqda.

Ular elchixonalarning poytaxtni tark etishi Moskva uchun targʻibot gʻalabasiga aylanishi va Ukraina «oʻz holiga tashlab qoʻyilgani» haqida taassurot uygʻotishidan xavotirda.

Shu sababli diplomatik vakolatxonalar xavfsizligi masalasi Ukrainaga siyosiy qoʻllab-quvvatlashni namoyish etish zarurati bilan birga koʻrib chiqilmoqda.

Zelenskiy: maqsad aholini shaharlardan ketishga majburlash

Xabarda qayd etilishicha, sentabrdan Rossiya qoʻshinlari Kiyevga dron va raketalar bilan hujumlarni kuchaytirgan. Zarbalar maktablar, shifoxonalar va maʼlumotlarni qayta ishlash markazlariga ham tekkan.

Ukraina prezidenti Volodimir Zelenskiy Financial Timesʼga bergan intervyusida Kreml havo hujumlari orqali tinch aholini qoʻrqitish, odamlarni shaharlardan ketishga majburlash va mamlakatning urushni davom ettirish imkoniyatlarini zaiflashtirishni koʻzlayotganini aytgan.

Uning soʻzlariga koʻra, asosiy nishonlar Kiyev, Xarkiv va Odessa hisoblanadi.

Razvedka maʼlumotlaridan xabardor Ukraina va Yevropa xavfsizlik idoralari vakillari Rossiya rejalarida Lviv ham borligini bildirgan. Polsha chegarasi yaqinidagi bu shahar muhim logistika markazi sanaladi.

Qishda elektr, issiqlik va suv taʼminotiga tahdid

The New York Times 2-oktabrda Kiyev Rossiyaning Ukrainaning yirik shaharlarini qishda elektr energiyasi, issiqlik va suv taʼminotidan uzishga oid rejalarini qoʻlga kiritgani haqida xabar bergan.