Farg‘onada qidiruvda bo‘lgan “Tracker” Kosonsoydan topildi 

Fuqarolik ishlari bo‘yicha Mirobod tumanlararo sudining  ijro varaqasiga asosan qarzdor M.J.dan undiruvchi “Avto alyans biznes” MChJ foydasiga “Tracker” rusumli davlat belgili avtomashinasidan tegishli davlat raqamini qaytarish bo‘yicha majburiy yuklash belgilangan. 

Mazkur sud hujjati Byuroning Qo‘qon shahar bo‘limi tomonidan ish yurituviga olinib, ijro ishi yurituvi qo‘zg‘atilgan  va qaror nusxasi qarzdor M.J.ga topshirilgan edi. 

Biroq qarzdor “Tracker” rusumli avtomashinani ixtiyoriy topshirmasdan qasddan yashirib qo‘ygan. Shunga ko‘ra, Byuroning Farg‘ona viloyat boshqarmasi qidiruv shu'basi xodimlari tomonidan 4 oydan ortiq vaqt mobaynida tezkor qidiruv tadbirlari o‘tkazib kelingan, biroq transport vositasini topish imkoni bo‘lmagan. 

Joriy yilning 18 iyun kuni kelib tushgan tezkor xabarga ko‘ra, Namangan viloyati Kosonsoy tumanida xizmatni olib borayotgan yo‘l-patrul xizmati inspektorlari tomonidan davlat raqam belgisi o‘rnatilmagan “Tracker” avtomashinasi to‘xtatilganligi va ko‘zdan kechirish jarayonida yukxonasidan tegishli davlat raqam belgisi mavjudligi aniqlangan.

Yo‘l-patrul xizmati inspektorlari tomonidan fuqaro M.Jalilovga nisbatan transport vositasini davlat raqam belgisisiz boshqarganligi sababli ma'muriy bayonnoma rasmiylashtirilishi bilan birga sud qarori ijrosi ham ta'minlangan.