Klaster usulida mebel mahsulotlari ishlab chiqarish yo‘lga qo‘yiladi

Prezident “Respublika hududlarida mebelsozlik sanoatini rivojlantirishga qaratilgan chora-tadbirlar to‘g‘risida”gi qarorni imzoladi.

Qarorga asosan, hududlarda klaster usulida mebel mahsulotlarini ishlab chiqarishga ixtisoslashgan kichik sanoat zonalari tashkil etiladi. Belgilanishicha:

a) kichik sanoat zonalaridagi ishlab chiqarish maydonlari mulk huquqi asosida elektron onlayn-auksion orqali realizatsiya qilinadi;

b) kichik sanoat zonalaridagi ishlab chiqarish maydonlariga egalik qilishning majburiy sharti sifatida ushbu kichik sanoat zonasining bosh rejasiga asosan mebel va uning butlovchi qismlarini ishlab chiqarish hamda realizatsiya qilish obektlarini joylashtirish belgilanadi;

v) kichik sanoat zonasidagi qishloq xo‘jaligida foydalanilgan yer maydonlarini mulk huquqi asosida elektron onlayn-auksion orqali realizatsiya qilishdan tushgan tushumning mahalliy budjetga yo‘naltiriladigan qismi budjetning qo‘shimcha daromadi sifatida shakllantiriladi va kamida 30 foizi ushbu hududda yangi yer maydonlarini qishloq xo‘jaligiga kiritish uchun sarflanadi;

g) tashkil qilinayotgan kichik sanoat zonalarining tashqi muhandislik-kommunikatsiya tarmoqlarini qurish tadbirlari:

• ichimlik suvi, oqova suv tarmoqlarini hamda avtomobil yo‘llarini qurish, rekonstruksiya qilish va ta'mirlash ishlari bo‘yicha – 2021-2023 yillar uchun davlat budjetida nazarda tutilgan mablag‘lar;
• elektr energiyasi, tabiiy gaz va aloqa tarmoqlarini qurish, rekonstruksiya qilish va ta'mirlash ishlari bo‘yicha – o‘rnatilgan tartibda ta'minotchi korxonalar mablag‘lari hisobidan amalga oshiriladi.

Belgilanishicha, kichik sanoat zonalarini tashkil qilish uchun yer maydoni ajratilishi bilan bog‘liq qishloq xo‘jaligi va o‘rmon xo‘jaligi ishlab chiqarishi nobudgarchiliklari o‘rnini qoplash bo‘yicha to‘lanadigan kompensatsiya to‘lovlari, istisno tariqasida, undirilmaydi.

2021 yil 15 iyundan boshlab, quyidagi xarajatlarni Eksportni rag‘batlantirish agentligi qoplab beradi:

• 2021-2024 yillarda yillik tushumida tayyor mebel mahsulotlari eksportidan tushum ulushi kamida 30 foizni tashkil qiladigan mahalliy korxonalarning xomashyo (TIF TN bo‘yicha 4410 va 4411 kodlari) importi uchun sarflangan transport xarajatlarining 50 foizi miqdorida;
• 2024 yil 1 yanvarga qadar mebel mahsulotlarini ishlab chiqarishga ixtisoslashgan eksport qiluvchi korxonalarga mebel mahsulotlarini barcha davlatlarga, shu jumladan, qo‘shni davlatlarga eksport qilishda avtomobil va temir yo‘l tashish xarajatlarining 50 foizi, biroq mahsulot eksport qiymatining (transport xarajatlarisiz) avtomobil transportida 5 foizidan, temir yo‘l transportida 7 foizidan ko‘p bo‘lmagan miqdorida.

2 oy muddatda “2021-2024 yillarda O‘zbekistonda mebel va yog‘ochsozlik sanoatini rivojlantirish dasturi” loyihasi ishlab chiqiladi. Unda quyidagilar nazarda tutiladi:

• respublika hududlarida qurilayotgan ko‘p kvartirali uy-joylarni aholining talabidan kelib chiqqan holda birinchi navbatda mahalliy mebel mahsulotlari bilan jihozlash bo‘yicha iste'mol kreditlarining yangi turlari va paketlarini joriy qilish;
• 2021-2024 yillarda respublika hududlaridagi davlat tashkilotlarining, shu jumladan, maktabgacha ta'lim, umumiy o‘rta va o‘rta maxsus ta'lim hamda sog‘liqni saqlash muassasalarining mebel jihozlarini yangilash grafigini tasdiqlash;
• mebel sanoatining barcha yo‘nalishlarida xomashyo sifatida foydalaniladigan daraxt turlarini respublika iqlim sharoitini hisobga olgan holda yetishtirish hamda respublika mebel sanoatida xomashyo sifatida foydalaniladigan daraxt turlari plantatsiyalarini barpo etish;
• xorijiy davlatlardagi (Xitoy, Turkiya hamda Yevropa davlatlari) yirik mebel ishlab chiqaruvchi kompaniyalar tomonidan respublikada ishlab chiqarish quvvatlarini ishga tushirish;
• Innovatsion rivojlanish vazirligi va “O‘zkimyosanoat” AJ bilan birgalikda respublika hududlarida MDF plitalari, HPL panellar, hamda mazkur qarorning 2-ilovasida ko‘rsatilgan xomashyo, ehtiyot qismlar, furnitura va aksessuarlar ishlab chiqarishga qaratilgan loyihalarni amalga oshirish.

2023 yil 1 yanvarga qadar mebel ishlab chiqarishda foydalaniladigan quyida ko‘rsatilgan 11 xil turdagi xomashyo, ehtiyot qismlar, furnitura va aksessuarlar importida bojxona bojining nol stavkasi qo‘llaniladi:

Qator hududlardagi kasb-hunarga o‘qitish muassasalarida tadbirkorlik sub'yektlarini jalb qilgan holda mebelsozlik bo‘yicha qisqa va o‘rta muddatli o‘quv kurslari tashkil etiladi.

“Mebel va yog‘ochsozlik sanoati” uyushmasi o‘quv kurslarini tashkil qilishi uchun “Ishga marhamat” monomarkazi Olmazor filiali binosida 5 ta xona tekin foydalanish huquqi asosida ajratiladi. Ushbu o‘quv kurslarida o‘qitiladigan “Temir daftar”, “Ayollar daftari” va “Yoshlar daftari”ga kiritilgan ishsiz fuqarolarning o‘quv xarajatlari belgilangan tartibda Bandlikka ko‘maklashish davlat jamg‘armasi mablag‘lari hisobidan moliyalashtiriladi.