Qashqadaryoning qator hududlarida elektr tarmoqlari va transformatorlar yangilanyapti

Foto: Qashqadaryo hududiy elektr tarmoqlari

Qashqadaryo viloyati hududlarida eskirgan elektr simlari, transformator punktlari va elektr ustunlarini yangilash davom etmoqda.

Viloyat bo‘yicha 674 mingdan ziyod elektr energiyasi iste'molchilari bo‘lib, shundan aholi iste'molchilari soni 629 mingdan ortiqni tashkil etadi. 45 ming nafari esa ulgurji iste'molchilar.

Mazkur iste'molchilar 28 ming uzunlikdagi 04, 110 kv kuchlanishli tarmoqlar va 10 mingga yaqin transformator punktlari orqali elektr energiya bilan ta'minlanadi.

Bu yil 1500 km elektr uzatish tarmoqlari va 400 dan ortiq transformator punktlarida yangi qurish hamda ta'mirlash rejalashtirilgan edi. Bugungacha 455 km.dan ziyod tarmoqlar va 148 dona transformator punktlarida yangi qurilish va rekonstruksiya amalga oshirilgan.

Jumladan «Obod qishloq» va «Obod mahalla» dasturi asosida 216 km tarmoqlar va 40 dona transformatorlar yangilangan.

Bu kabi ishlarni amalga oshirish uchun viloyat bo‘yicha 90 nafar mutaxassisdan iborat 15 ta brigada tashkil etilgan. 4 dona yuk tashuvchi, 4 dona avtokran va 13 dona boshqa maxsus mashinalar tashkil etilgan. Bu ishlar natijasida yil oxirigacha 400 ga yaqin mahallada elektr sifati yaxshilanishi ko‘zda tutilgan.

Misol uchun, Mirishkor tumanida «Obod qishloq» dasturi doirasida 1,1 milliard so‘m mablag‘ aynan elektr ta'minoti tizimini takomillashtirish, yangi tarmoqlarni qurish, rekonstruksiya maqsadlari uchun mo‘ljallangan. Tumanning Zafar va Bo‘ston MFYlarida 12,6 km elektr uzatish tarmoqlarini yangilash, 2 ta transformator punktini qurish ishlari amalga oshirilmoqda. Qolgan eski transformatorlar ta'mirlab berilyapti.

Tuman bo‘yicha esa yangilanadigan elektr tarmoqlari 41 km.ni, yangi transformatorlar 16 tani tashkil etadi. Natijada 893 ta xonadon, 6 ta ijtimoiy soha obekti, 49 ta ulgurji iste'molchilarning elektr energiyasi ta'minoti tubdan yaxshilanadi.

Xuddi shunday, Qarshi shahar elektr tarmoqlari korxonasining mutaxassis xodimlari Otchopar va Mag‘zon MFYlarida amalga oshirilayotgan «Obod mahalla» dasturining samarali ijrosida va ko‘p qavatli uylar atrofida obodonchilik, elektr liniyalari rekonstruksiyasini amalga oshirilmoqda.