Qashqadaryoda hovlisida 198 tup ko‘knor yetishtirayotgan shaxsga jinoiy ish qo‘zg‘atildi

Qashqadaryo viloyati Shahrisabz tumanida o‘z hovlisida 198 tup ko‘knor giyohvandlik o‘simligini yetishtirayotgan shaxsga jinoiy ish qo‘zg‘atilgan. Bu haqda viloyat IIB xabar bermoqda.

Ma'lum qilinishicha, 2021 yil 1 iyul kuni soat 12:00larda, Shahrisabz tuman IIB xodimlari tomonidan o‘tkazilgan tadbirda tumanning «Oqdaryo» MFYda yashovchi S.R.ning yashash uyi tegishli tartibda ko‘zdan kechirilgan. Tadbirda S.R. hovlisidagi ekin maydonida 198 tup yashil rangli, o‘tkir hidli o‘simlikni qonunga xilof ravishda ekib parvarish qilib kelayotganligi aniqlanib, tegishli tartibda xujjatlashtirib olingan.

Shahrisabz shahar IIB EKBning xulosasida, S.R.ning hovlisidan olingan 198 tup yashil rangli, o‘tkir hidli, nam holatdagi o‘simliklar tarkibida tetragidrokannabinol giyohvand moddasi bor bo‘lgan ko‘knor o‘simligi ekanligi ko‘rsatilgan.

Qayd etilishicha, mazkur holat yuzasidan Shahrisabz tumani IIB tergov bo‘limi tomonidan S.R.ga nisbatan Jinoyat kodeksining tegishli moddalari bilan jinoiy ish qo‘zg‘atilgan.