Qashqadaryoda ayol 2 nafar farzandi bilan o‘zini poyezd ostiga tashlab vafot etdi. Holat yuzasidan jinoiy ish qo‘zg‘atildi

Ma'lum qilinishicha,  2021 yil 11 iyul kuni soat 14:55larda Qashqadaryo viloyati IIB Transportda xavfsizlikni ta'minlash bo‘limi navbatchilik qismiga Samarqand-Qarshi yo‘nalishida harakatlanib ketayotgan elektrovoz ayol va ikki nafar bolani urib yuborgani to‘g‘risida xabar kelib tushgan.

Ushbu holat yuzasidan olib borilgan tergovga qadar tekshiruv harakatlari davomida aniqlanishicha, 2021 yil 11 iyul kuni soat 14:30larda 49 ta yuk vagondan iborat yuk poyezdi mashinisti Samarqand-Qarshi yo‘nalishida harakatlanib borayotib, Chiroqchi tumani «Sho‘rbozor» MFY hududidan o‘tayotganda taxminan 100-150 metr masofada ayol va ikki nafar bolani ko‘rib qolgan. Ularga ogohlantiruv signalini chalgan va tormoz bosgan.

Ammo poyezd yaqin masofaga kelganda Chiroqchi tumani, «Sho‘rbozor» MFY, Sho‘rbozor qishlog‘ida yashovchi fuqaro G.E. ogohlantiruvchi signal berishiga qaramasdan o‘zini va ikki nafar voyaga yetmagan farzandi 2015 yilda tug‘ilgan Sh.S va 2021 yil martda tug‘ilgan S.B. bilan poyezd ostiga tashlagan. Oqibatda, ularning uchalasi ham og‘ir tan jarohatlari olib, hodisa joyida vafot etgan.

Ta'kidlanishicha, mazkur holat yuzasidan Jinoyat kodeksining 97-moddasi 2-qismi «a» bandi bilan jinoyat ishi qo‘zg‘atilgan. Hozirda Qarshi transport prokurori tomonidan jinoyat ishi bo‘yicha dastlabki tergov harakatlari olib borilmoqda.

Ijtimoiy tarmoqlarda yozilishicha, ayolning turmush o‘rtog‘i Rossiyada bo‘lgan. O‘sha kuni u qaynotasi bilan tortishib qolib, o‘zi va farzandlarining joniga qasd qilgan.