Musulmonlar idorasi muftiy Usmonxon Alimovning sog‘lig‘i yomonlashgani haqidagi xabarlarni rad etdi

O‘zbekiston musulmonlari idorasining Kun.uz’ga ma'lum qilishicha, muftiy Usmonxon Alimov salomatligini yaxshilash uchun navbatdagi davolanish muolajalarini olmoqda.

«Muftiy hazratlari ayni damda shifoxonada, u kishining sog‘ligi malakali tibbiyot mutaxassislari va shifokorlar tomonidan muntazam kuzatib borilmoqda. Shuningdek, davolanish bosqichlari ham o‘tkazilmoqda. Alloh taologa shukrki, ayni paytda muftiy hazratlarining sihatlari barqarordir», deydi idora matbuot xizmati xodimi.

Shuningdek, O‘zbekiston musulmonlari idorasi asossiz va voqelikka to‘g‘ri kelmaydigan xabarlarni tarqatish Islom dinida gunoh sanalishi, qonunchilikda esa javobgarlikka sabab bo‘lishini eslatdi.