O‘zbekistonga Airbus vertolyotlari olib kelindi

Uzbekistan Airways parki fuqarolik aviatsiyasi xizmatini ko‘rsatuvchi ikkita Airbus vertolyoti bilan boyitildi. Yana ikkita vertolyot oktyabr oyida olib kelinadi.

2021 yil fevral oyida transport vaziri o‘rinbosari Jasurbek Choriyev hamda Airbus International kompaniyasining Sharqiy Yevropa va Markaziy Osiyo mintaqasi bo‘yicha vitse-prezidenti Jak Garrig Airbus Helicopters kompaniyasi tomonidan ishlab chiqariluvchi to‘rtta vertolyot xaridi bo‘yicha kelishuvga erishilgan edi.

Ma'lum bo‘lishicha, bu vertolyotlardan birinchisi 4 iyunda, ikkinchi 12 iyunda O‘zbekistonga yetib kelgan va shu kungacha rasmiylashtirish jarayoni o‘tkazilgan.

Keltirilgan bu vertolyotlar H-125 modelda bo‘lib, oktabr oyida yetib kelishi rejalashtirilayotgan H-130 modeldagi qolgan ikkita vertolyot birmuncha yirikroq o‘lchamda bo‘ladi.

Bugun, 31 iyul kuni vertolyotlarning taqdimot marosimi bo‘lib o‘tdi. Bu O‘zbekistonda fuqarolik aviatsiyasining yangi yo‘nalishi ochilganidan darak beradi. Taqdimot marosimida bosh vazir o‘rinbosari Aziz Abduhakimov ham ishtirok etdi.