Samarqandda fuqaroni o‘qishga kiritib qo‘yishini aytib 2700 dollar olgan shaxs ushlandi

Samarqand viloyati Ishtixon tumanida fuqaroni o‘qishga kiritib qo‘yishini aytib 2700 AQSh dollari olgan shaxs ushlangan. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.

Ma'lum qilinishicha, Bosh prokuratura huzuridagi departamentning Ishtixon tumani bo‘limi tomonidan o‘tkazilgan tergovga qadar tekshiruvda, fuqaro R.B. ushlangan. U fuqaro A.ning ishonchiga kirib, uni O‘zbekiston davlat jismoniy tarbiya va sport universitetiga tanishlari orqali o‘qishga kiritib qo‘yish evaziga 2 700 dollarni qo‘lga kiritgani aniqlangan.

Qayd etilishicha, mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.