Samarqandda 3500 dollar evaziga fuqaroning o‘qishini Qirg‘izistondan ko‘chirtirib bermoqchi bo‘lgan shaxs ushlandi

Samarqand viloyatida o‘zini Milliy gvardiya xodimi deb tanishtirib, 3500 AQSh dollari evaziga fuqaroning o‘qishini Qirg‘izistondan ko‘chirtirib bermoqchi bo‘lgan shaxs qo‘lga olingan. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.

Ma'lum qilinishicha, Bosh prokuratura huzuridagi departamentning Samarqand viloyati boshqarmasi DXX va Milliy gvardiya xodimlari bilan hamkorlikda o‘tkazgan tezkor tadbirda fuqaro R.Y. qo‘lga olingan.

Qayd etilishicha, R.Y. fuqaro M.ga o‘zini Milliy gvardiya xodimi deb tanishtirib, uning Qirg‘iziston Respublikasi, Jalolobod shahrida joylashgan Zamanbap El Aralik universitetidagi o‘qishini Samarqand davlat universitetiga ko‘chirib berish evaziga 3 500 dollar olgan vaqtda ashyoviy dalillar bilan ushlangan.

Ta'kidlanishicha, mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, prokuraturaga yuborilgan.