Joriy yilda Jizzax viloyatida sodir bo‘lgan yo‘l-transport hodisalarining 33 tasi haydovchilarning uxlab qolishi tufayli yuz bergan. Bu haqda viloyat IIB YHXB xabar bermoqda.
Ma'lum qilinishicha, 2021 yilning o‘tgan davri mobaynida Jizzax viloyati hududida sodir bo‘lgan yo‘l-transport hodisalarining 33 tasi haydovchilarning uxlab qolib, boshqaruvni yo‘qotishi oqibatida sodir bo‘lgan. Mazkur yo‘l-transport hodisalarida 20 nafar inson vafot etgan.
Qayd etilishicha, M39 Almati-Toshkent-Termiz xalqaro avtomobil yo‘lining Jizzax viloyati hududidan o‘tgan qismidan bir sutka davomida o‘rtacha 25-30 mingta turli transport vositalari harakatlanadi. Soha mutaxassislarining bildirishicha, to‘rt soat avtomobil boshqargan haydovchi organizmida charchoq alomatlari bo‘ladi. Shu sababli ma'lum vaqtda mashina boshqargan haydovchilarga to‘xtab dam olish tavsiya etiladi.
