Olimpiada 2020: O‘zbekiston ayollar o‘rtasidagi yettikurashning jahon maydoniga qadam bosadimi?

Tokio-2020 yozgi Olimpiya o‘yinlarida ishtirok etishi natijasida O‘zbekiston Yengil atletika federatsiyasi ko‘p yillar mobaynida ilk marotaba ayollar o‘rtasidagi yettikurash bo‘yicha o‘zining pozitsiyalarini yaxshilashga erishdi. Yengil atletikachi Yekaterina Voronina 6 298 ochko to‘plagan holda dunyoning 12 ta eng kuchli yettikurashchisi o‘rtasida 12-o‘rinni egalladi.

Markaziy, Janubiy-G‘arbiy va Janubiy Osiyo mintaqasidan ishtirok etgan yagona vakil Yekaterina Voronina O‘zbekistonning bo‘lajak yettikurashchilari uchun eshik ochganday bo‘lib, 24 jahon sportchilaridan tashkil topgan olimpik reyting markazidan joy egalladi.

Tokiodagi Olimpiadada yettita yo‘nalish bo‘yicha ikki kun kurash olib borib Yekaterina yugurish turlarida uchta shaxsiy rekordini o‘rnatdi: yuz metrga to‘siqlar osha yugurish, undan so‘ng natijasini 14,27 soniyaga oshirgan holda, 14,19 soniyada uddaladi, 24,85 soniya o‘rniga 200 metrni 24,67 soniya ichida yugurib o‘tdi va 800 metrga yugurishda 2:09.73 daqiqa natija bilan finishga yetib keldi. 2020 yilning oxirida olingan yelka jarohati Voroninaning Olimpiya o‘yinlarida zaif joyi bo‘lib, u nayza va yadro uloqtirishda yuqori natijalarni ko‘rsatishga imkoniyat bermadi, bu esa umumiy ochko pasayishiga olib keldi. Zo‘raki mashqlarning kamaytirilishi va Yengil atletika federatsiyasi tomonidan ko‘rsatilgan tibbiy yordamga qaramasdan, yelka bo‘g‘imining harakatchanligi va bukiluvchanligi olimpiadaning boshlanish paytigacha hali butunlay tiklanmagan edi.

Yekaterinaning ta'kidlashicha, yengil atletikaning yettikurash kabi mashaqqatli va ko‘p quvvat sarflanadigan turida jarohatlar bo‘lishi tabiiy. Zarur bo‘lgan psixologik kayfiyat, o‘z ishiga bo‘lgan muhabbat hamda muntazam ravishda ishlash,  o‘zingizni takomillashtirish istagisiz esa ish ancha qiyinroq amalga oshadi.

«Men uchun yettikurashda ishtirok etish – bu o‘z ustimdan g‘alaba qozonish degani. Men deyarli har doim natijalarimdan qoniqmayman, hattoki shaxsiy yuqori natijani ko‘rsatganimda ham, doimo salbiy taraflarini va nyuanslarini qidiraman. Ehtimol, hayotimdagi eng asosiy jumlalardan biri bu - "Men yaxshiroq qila olaman va men yaxshiroq natija bo‘lishini istayman", — deb o‘rtoqlashdi Yekaterina. — Olimpiya o‘yinlarida g‘alaba qozonib, barcha mavjud jahon rekordlarini o‘rnatganimda ham, o‘zimga bu hali chegarasi emas, deb gapirsam kerak. Men o‘zimdan doim ko‘prog‘ini talab qilaman. Va ushbu ko‘pkurashdagi asosiy raqibim – men o‘zim. Ko‘pkurash meni yanada kuchliroq qiladi».

Yengil atletikada o‘zining professional yo‘lini nayza uloqtirishdan boshlagan Yekaterina, sportchilar uchun ancha kech hisoblangan 18 yoshda, qiziqishini ko‘pkurash tarafga yo‘naltirib, o‘n kurash bo‘yicha tajribali sportchi Pavel Andreyev bilan mashq qilishni boshladi. Jamoada ishlashni boshlagandan atigi uch yildan so‘ng u mukofotli o‘rinlarni egallashni boshladi. 2013 yilda Puna (Hindiston) shahridagi Osiyo chempionatida yettikurashda kumush medalni qo‘lga kiritadi, 2014 yilda Inchondagi (Janubiy Koreya) XVII yozgi Osiyo o‘yinlarida chempion unvoniga ega bo‘ladi, 2015 yilda esa Uhan (Xitoy) shahridagi yettikurashda Osiyo chempioniga aylanadi. 2019 yilda Dohadagi (Qatar) Osiyo chempionatida birinchi o‘rinni egallagan holda, so‘zsiz yetakchi bo‘ldi. Xuddi o‘sha 2019 yilda va yana o‘sha Doha (Qatar) shahrida o‘tkazilgan yettikurash bo‘yicha jahon chempionati Yekaterinaga dunyoning eng kuchli yengil atletikachilari – yettikurashchilari orasida 10-o‘rinni olib keldi va Tokio-2020 Olimpiada o‘yinlarida ishtirok etishi uchun uning baxtli chiptasiga aylandi.

Ha, ayollar o‘rtasidagi yettikurashda Olimpiya o‘yinlari davomida ustunlik qat'iy ravishda Belgiya, Niderlandiya, Buyuk Britaniya, AQSh, Avstriya, Shvetsiyadan sportchilarni tomonida ekanligi ko‘rinib turdi. London (2012) va Rio de Janeyrodagi (2016) Olimpiya o‘yinlari ham ko‘pkurash bo‘yicha o‘zbekistonlik yengil atletikachilar Yuliya Tarasova va Yekaterina Voronina uchun ushbu sport turining poygasidan chiqib ketish bilan yakunlandi.

Biroq Tokiodagi Olimpiada mamlakatda ayollar o‘rtasidagi ko‘pkurashning rivojlanishi uchun yangi sifatli boshlanish bo‘lib xizmat qildi va O‘zbekiston Yengil atletika federatsiyasi oldida yangi vazifalarni belgiladi.

Hozircha esa Katya faqat bitta narsani – tezroq Toshkentga qaytib, u uchun qayg‘urgan va ashaddiy muxlislari bo‘lgan oila a'zolarini quchog‘iga olish va qizalog‘idan: “Oyijon, sen albatta barchasini uddalaysan!” degan so‘zlarini eshitishni, ertasi kuni ertalab esa yana o‘zining sevimli “Paxtakor” mashqlar zaliga yo‘l olishni istaydi.

Sayt:  https://uzathletics.uz/