Jizzaxda aholi xonadonlari joylashgan ikki qavatli uyning tomi yonib ketdi

Jizzax viloyati Paxtakor tumanida aholi xonadonlari joylashgan ikki qavatli uyning tomi yonib ketgan. Bu haqda viloyat Favqulodda vaziyatlar boshqarmasi axborot xizmati xabar bermoqda.

Ma'lum qilinishicha, bugun, 28 sentyabr kuni soat 10:20larda Jizzax viloyati FVB tezkor boshqaruv markaziga Paxtakor tumani “Paxtakor” QFYda joylashgan ikki qavatli uyning tom qismida kuchli yong‘in sodir bo‘lgani to‘g‘risida ma'lumot kelib tushgan.

Hodisa joyiga darhol 4 ta yong‘in bo‘linmasi hamda 26 nafar shaxsiy tarkib chiqarilgan. Qutqaruvchilar tomonidan 4 ta xonadonda evakuatsiya ishlari tashkil etilib, yong‘inni bartaraf etish ishlari olib borilgan.

Qayd etilishicha, qisqa muddatda yong‘in to‘liq bartaraf etilib, yong‘indan keyingi ishlar amalga oshirilmoqda. Mazkur hodisada hech kim jabrlanmagan va halok bo‘lmagan. Yong‘in oqibatida ikki qavatli uyning tom qismi yonib ketgan. Bundan tashqari, bir nechta xonadon zarar ko‘rgan. Hozirda, yong‘in sabablari va ko‘rilgan moddiy zarar miqdori aniqlanmoqda.

Eslatib o‘tamiz, Jizzax viloyatida 27 sentabr kuni ikkita yong‘in yuz bergan. Yong‘inlardan biri oshxonada kelib chiqqan, ikkinchisida toylangan somon yonib ketgan.