Buxoro neftni qayta ishlash zavodiga qarashli neft saqlash omborida roʻy bergan yongʻin oqibatida uch kishi jarohatlangan.
FVV xabariga koʻra, 15-sentabr kuni soat 10:30 da 112 tizimidan Buxoro viloyati, Qorovulbozor tumani, «Choʻlquvar» MFY hududida joylashgan Qorovulbozor neft mahsulotlarini saqlash omboridagi sigʻim (rezervuar)lardan birida yongʻin sodir boʻlgani toʻgʻrisida FVBga xabar kelib tushgan.
Xabarga asosan tezkorlik bilan qutqaruv boʻlinmalari hodisa joyiga yetib borib, yongʻin soat 11:18 da oʻchirildi. Yongʻinni bartaraf etishga 14 ta qutqaruv boʻlinmasi jalb etildi.
Dastlabki maʼlumotlarga koʻra, ombordagi yoqilgʻi sigʻimi (rezervuar) yonib zararlangan. Yongʻin oqibatida 3 kishi turli darajadagi kuyish tan jarohatlari olib Qorakoʻl tumani tibbiyot birlashmasiga yotqizilgan.
Hozirda yongʻin sababi va zarari aniqlanmoqda.
Viloyat FVB, IIB, SSB rahbariyati va hamkor xizmat xodimlari voqea joyiga chiqqan.
