Samarqandda qarzdor ota farzandlari voyaga yetguncha bo‘lgan muddatni hisoblab 132 million so‘m aliment to‘ladi

Ma'lum qilinishicha, Fuqarolik ishlari bo‘yicha Kattaqo‘rg‘on tumanlararo sudining 2019 yil 27 iyundagi qaroriga asosan qarzdor A.X.dan undiruvchi Sh.R.ga bir nafar farzandining ta'minoti uchun daromadning to‘rtdan bir qism miqdorda aliment undirish belgilangan. Sud qaroriga asosan MIB Paxtachi tuman bo‘limi tomonidan ijro ishi yuritilgan.

Mazkur ijro hujjatiga asosan qarzdorning mol-mulklarini aniqlash maqsadida “Sud hujjatlari va boshqa organlar hujjatlarini ijro etish to‘g‘risida”gi Qonunning 21, 87-moddalariga asosan tegishli tashkilotlarga so‘rovnomalar yuborilgan. Olingan ma'lumotlarga asosan qarzdorning barcha mol-mulklariga taqiq qo‘yilgan.

Muqim daromadi bo‘lmagan, kam ta'minlangan va ijtimoiy himoyaga muhtoj aholini qo‘llab-quvvatlash kerakligi inobatga olinib, MIB xodimlari qarzdor A.X. bilan suhbat o‘tkazgan. Unga farzandlarini moddiy qo‘llab-quvvatlash har bir otaning burchi ekani tushuntirilgan.

Bunday maslahat va suhbatdan o‘ziga to‘g‘ri xulosa chiqargan qarzdor ota farzandi voyaga yetguniga qadar bo‘lgan muddat uchun hisoblangan 132 million 477 ming so‘mni to‘lab bergan. Shundan so‘ng tomonlarning roziligi bilan mazkur sud hujjati qonunning 40-moddasi 1-bandiga asosan tamomlangan.