Aliment to‘lamaslik uchun xotini va qizini o‘ldirgan erkak 19 yilga qamaldi

«Zamon» ko‘rsatuvi xabariga ko‘ra, Hayitov familiyali erkak 2025 yil 3 noyabr kuni spirtli ichimlik ta’sirida qaynotasiga tegishli xonadonga borgan. U yerda ikki nafar farzandi bilan yashab kelayotgan turmush o‘rtog‘i bilan uchrashgan. Aniqlanishicha, ayol avvalroq turmush o‘rtog‘ini aliment undirish masalasida sudga bergan va sud qaroriga ko‘ra erkak 15 sutkaga qamalgan.

Erkak jazo muddatini o‘tab chiqqach, mojaro yanada keskinlashgan. Tergov ma’lumotlariga ko‘ra, u aliment to‘lashdan qutulish maqsadida voyaga yetmagan farzandlari ko‘z o‘ngida cho‘ntagida olib kelgan oshxona pichog‘i bilan turmush o‘rtog‘iga bir necha marotaba tan jarohati yetkazgan. Shundan so‘ng u 2023 yilda tug‘ilgan qiziga ham pichoq bilan zarba bergan.

Oqibatda bola voqea joyida halok bo‘lgan, ayol esa shifoxonaga olib ketilayotgan vaqtda jon bergan. Jinoyatni sodir etgan erkak voqea joyidan qochib ketgan. Jinoyat ishlari bo‘yicha O‘zbekiston tumani sudi uni Jinoyat kodeksining 97-moddasi 2-qismi “a”, “v”, “j”, “i” bandlari bilan aybdor deb topib, 19 yil muddatga ozodlikdan mahrum qildi. U jazoni umumiy tartibli koloniyada o‘taydi.