16:31 / 17.11.2021
38784

Toshkentda ifloslangan qor yog‘ishining sababi ma’lum qilindi

Toshkentda ifloslangan qor yog‘ishiga 4 noyabrda Qozog‘iston janubida va 16 noyabrda Buxoro viloyatida kuzatilgan qum bo‘ronlari sabab bo‘ldi, deya ma’lum qildi “O‘zgidromet”. Kun.uz muxbiri g‘uborli qorga burkangan shahar manzarasida kun mavzusi haqida so‘z yuritdi.

17 noyabr kuni Toshkent shahrida tarkibida chang zarralari bo‘lgan iflos qor yog‘di. Gidrometeorologiya xizmati markazi mazkur qor tarkibi o‘rganib chiqilgani va nega bunday changli yog‘in kuzatilgani borasida axborot berdi.

“Ifloslangan qor yog‘ishiga 4 noyabrda Qozog‘iston janubida va 16 noyabrda Buxoro viloyatida kuzatilgan qum bo‘ronlari sabab bo‘ldi. Agar Toshkentda 14 noyabrda yog‘inlar yog‘ib havo tozalangan bo‘lsa, Buxoro viloyatida esa yog‘inlar bo‘lmadi.

17 noyabrda respublikaning butun hududiga shamolning tezlashishi va ba’zi joylarda qumli bo‘ron bilan sovuq nam havo massasi kirib keldi. Shamol tezligidan ko‘tarilgan chang masofaga ko‘chdi va tuproq va qum rangini bo‘yab Toshkent shahriga cho‘kdi”, deyiladi xabarda.

Foto: O‘zgidromet

Bildirilishicha, mazkur qorning yog‘ishi inson salomatligiga ziyon yetkazmaydi va havoni tozalaydi.

“Atmosfera havosi tahlil natijalari ko‘rsatkichlari: qorning pH (kislotalilik) - 9,6 ni tashkil etdi. Ishqorli muhit odatda pH - 7 bo‘ladi. Elektr o‘tkazuvchanlik 73,2 ni tashkil etdi, bu anionlar va kationlarning uncha katta bo‘lmagan konsentratsiyasidan dalolat bo‘ladi va inson salomatligiga ziyon yetkazmaydi.

5:10 da Toshkent shahrida atmosfera havosida muallaq zarralarning keskin oshishi qayd etildi, ular 2.3 REM’ni tashkil etdi. Yog‘inlar yog‘ishi natijasida havoning tozalanishi sodir bo‘ladi”, deya yozadi “O‘zgidromet”.

Foto: Kun.uz / Muhiddin Nido

Eslatib o‘tamiz, 4 noyabr kuni Toshkentda g‘ayrioddiy chang-qumli tuman tushishi hodisasi kuzatildi. Shahar havosida chang miqdori me’yordagidan 30 barobargacha ortib ketdi.

Mavzuga oid
Top