Imtiyozli shaxslarni qabul qiluvchi xususiy klinikada nimalar bo‘lishi kerakligi aniq belgilandi

Talablar prezidentning "Sog‘liqni saqlash sohasida ixtisoslashtirilgan tibbiy yordam ko‘rsatish tizimini yanada takomillashtirish chora-tadbirlari to‘g‘risida"gi qaroriga muvofiq ishlab chiqilgan.

Nodavlat tibbiyot tashkilotlari imtiyozli toifaga kiruvchi shaxslarga Davlat budjeti mablag‘lari hisobidan tibbiy xizmatlar ko‘rsatish uchun quyidagi talablarga javob berishi lozim:

a) maslahat, diagnostika va konservativ davolashdan iborat bo‘lgan statsionar turdagi nodavlat tibbiyot tashkilotlari uchun:

tibbiy ixtisoslashuvning tegishli turini amalga oshirish uchun zarur bo‘lgan moddiy-texnik baza, asbob-uskunalar va boshqa texnik vositalar, shu jumladan tibbiy texnikaga eng kam talablarga (ro‘yxat raqami 2905, 28.07.2017 y.) muvofiq statsionar turdagi nodavlat tibbiyot tashkilotlari uchun belgilangan tibbiy ixtisoslashuvning tegishli turini amalga oshirish uchun zarur bo‘lgan moddiy-texnik baza, asbob-uskunalar va boshqa texnik vositalar bilan jihozlangan bo‘lishi;

sterilizatsiya, klinik laboratoriya, intensiv terapiya bo‘limlarining mavjud bo‘lishi;

ixtisoslik (ixtisosliklar) doirasida ambulator-poliklinika xizmatining mavjudligi;

b) maslahat, diagnostika, konservativ va operativ davolashdan iborat bo‘lgan statsionar turdagi nodavlat tibbiyot tashkilotlari uchun mazkur talablarning "a" kichik bandida nazarda tutilgan talablar bilan birgalikda, qo‘shimcha ravishda quyidagilar:

anesteziologiya va reanimatologiya bo‘limining mavjud bo‘lishi;

kamida ikkita operatsiya bo‘limlarining mavjud bo‘lishi;

operatsiya qiluvchi shifokorlarda kamida birinchi malakaviy toifaning mavjud bo‘lishi.