O‘zbekiston mulk daxlsizligi ta'minlanmagan davlatlar ro‘yxatiga kiritildi

O‘zbekiston mulklarni sud qarorisiz va adolatli tovon pulisiz musodara qilish bo‘yicha reytingda eng yomon natijalardan birini qayd etgan. Bu haqda 10 dekabr kuni prezident farmoniga zid ravishda jonli efirga uzatilmasdan o‘tkazilgan Oliy Majlis Qonunchilik palatasining yig‘ilishida aytib o‘tilgan.

Yig‘ilishda deputatlarga Jahon odil sudlov loyihasi xalqaro nohukumat tashkiloti tomonidan yuritiladigan “Huquq ustuvorligi” indeksiga doir ma'lumotlar taqdim qilingan. Bu haqda Rasul Kusherbayev ma'lum qildi.

Ushbu indeksdagi “Qonunlarga rioya qilish” indikatorining “Hukumat sud qarorisiz va adolatli tovon pulisiz mulkni musodara qilmasligi” subindikatorida (2021 yil hisobotida) O‘zbekiston maksimal 1 balldan 0.25 ball bilan 139 ta mamlakat ichida 138-o‘rinni egallagan.

“Pozor! Xususiy mulk daxlsizligi bo‘yicha xalqaro hamjamiyatda O‘zbekistonning mana shu kulgili ahvolga tushishiga hissa qo‘shgan barcha amaldorlarga “rahmat!” deb yozdi Oliy Majlis deputati.

Ma'lumot uchun, kecha bo‘lib o‘tgan yalpi majlisda deputatlar “Yer uchastkalarini kompensatsiya evaziga jamoat ehtiyojlari uchun olib qo‘yish tartib-taomillari to‘g‘risida”gi qonun loyihasini birinchi o‘qishda qabul qildi.

Qonunchilik palatasi va Milliy teleradiokompaniya 1 dekabrdan kuchga kirgan prezident farmonini pisand qilmasdan yalpi majlisni jonli efirga uzatmasdan kelmoqda.