O‘zbekistonliklarni Boliviya, Kolumbiya va Meksika orqali Amerikaga yubormoqchi bo‘lgan guruh a’zolari qo‘lga olindi

DXX Samarqand viloyati bo‘yicha boshqarmasi va viloyat IIB xodimlari 2 nafar fuqaroni 60 ming dollar evaziga noqonuniy ravishda AQShga yuborishini aytib, oldindan 20 ming dollar olgan firibgarlarni qo‘lga olgan.

Qayd etilishicha, tezkor tadbir davomida Samarqand tumanida yashovchi, 1985 va 1991 yillarda tug‘ilgan 2 nafar shaxs Samarqand shahrida istiqomat qiluvchi 2 kishini Amerika Qo‘shma Shtatlariga yuborish uchun ularning har biridan 30 ming dollardan, jami 60 ming AQSh dollari talab qilib, oldindan 20 ming dollar olgan vaqtlarida ushlangan.

Surishtiruvlardan so‘ng qonunbuzarlar O‘zbekiston fuqarolarini “O‘zbekiston–Turkiya–Boliviya–Kolumbiya–Meksika–AQSh” yo‘nalishi orqali manziliga yetkazib qo‘yishni rejalashtirgani aniqlangan.

Ular mijozlariga yo‘lga chiqishdan avval PZR-test ma’lumotnomasiga va hisobida 4 ming AQSh dollari bo‘lgan VISA-kartaga ega bo‘lishlari kerakligi hamda har bir davlat hududida ularni kuzatib qo‘yuvchi shaxslarning talablarini, jumladan, Amazonka daryosining Kolumbiyadan oqib o‘tuvchi qismidan va Meksikaning o‘rmonlaridan o‘tib olish bo‘yicha talablarini bajarishlari zarurligini tushuntirishgan.

Bundan tashqari, tezkor tadbir davomida hibsga olingan shaxslarda 60 nafardan ortiq fuqaroning pasport nusxalari borligi ham aniqlangan.

“Hozirda mazkur holat yuzasidan Jinoyat kodeksining tegishli moddasiga asosan jinoyat ishi qo‘zg‘atilib, tergov harakatlari olib borilmoqda”, deyiladi xabarda.

Avvalroq “Amerika orzusi” yo‘lida minglab odamlar qatori o‘zbekistonliklar ham jonini xatarga qo‘yayotgani, Meksika va AQSh chegarasini noqonuniy kesib o‘tmoqchi bo‘lgan o‘zbekistonliklar qo‘lga olingani haqida xabar berilgandi.