Abdulla Aripov Qozog‘iston yangi bosh vazirini tabrikladi

O‘zbekiston Respublikasi Bosh vaziri Abdulla Aripov Alixan Smailovni Qozog‘iston hukumatining yangi bosh vaziri etib tayinlagani bilan tabrikladi.

O‘zbekiston bosh vaziri matbuot xizmatiga ko‘ra, 11 yanvar kuni Abdulla Aripov va Alixan Smailov o‘rtasida telefon orqali muloqot bo‘lib o‘tgan.

«Suhbat davomida oliy va yuqori darajadagi uchrashuvlar chog‘ida erishilgan kelishuvlarni birgalikda izchil amalga oshirish, ochiqlik, an’anaviy do‘stlik va yaxshi qo‘shnichilikka asoslangan ko‘p qirrali strategik sheriklik hamda ittifoqchilik munosabatlarini yanada kengaytirishni davom ettirish ta’kidlandi», deyiladi hukumat xabarida.

Qozog‘iston hukumati matbuot xizmati xabarida Qozog‘iston avval erishilgan kelishuvlarni amalga oshirishga e’tibor qaratayotgani qayd etilgan.

«Qozog‘iston hukumati qardosh O‘zbekiston Respublikasi bilan strategik sheriklikni chuqurlashtirishga qat’iy sodiq qoladi. Ilgari erishilgan kelishuvlarni amalga oshirish ahdimiz qat’iy. Ishonchim komilki, ikki tomonlama hamkorlik kun tartibi doirasida belgilangan rejalar birgalikdagi sa’y-harakatlar asosida amalga oshiriladi»,  deya ta’kidlanadi Alixan Smailov bayonotida.

Eslatib o‘tamiz, joriy yilning 5 yanvar kuni Qozog‘istonni qamrab olgan ommaviy namoyishlar fonida Qosim-Jo‘mart To‘qayev Asqar Mamin boshchiligidagi hukumatni iste’foga chiqargan edi.

11 yanvar kuni To‘qayev taklif qilgan Alixan Smailov nomzodi parlament majlisida qo‘llab-quvvatlandi.

Alixan Smailov 49 yoshda. Olmaota shahrida tug‘ilgan. U faoliyati davomida Qozog‘iston Statistika agentligi raisi, tashqi ishlar vaziri o‘rinbosari, moliya vaziri o‘rinbosari, Qozog‘iston prezidentining yordamchisi, moliya vaziri bo‘lib ishlagan.