Qoʻshimcha funksionallar
-
Tungi ko‘rinish
«Kitob savdosi» mojarosi ortidan ishdan ketgan mudir boshqa rahbarlik lavozimini egalladi
Karmana tuman XTB sobiq mudiri Nasiba Sodiqova g‘ayriqonuniy «kitob savdosi» sabab lavozimidan olinganidan 23 kun o‘tib O‘zbekiston Xalq demokratik partiyasi Navoiy viloyati kengashiga rahbar bo‘ldi.
Karmana tumani XTBning sobiq mudiri Nasiba Sodiqova O‘zbekiston Xalq demokratik partiyasi Navoiy viloyati kengashi rahbari lavozimida ish boshlagan. Bu haqda O‘zbekiston Xalq demokratik partiyasi Navoiy viloyati kengashining ijtimoiy tarmoqlardagi guruhida ma’lum qilindi.
Ushbu lavozimda ishlab kelgan Maqsud Nurullayev esa viloyat hokimligi kotibiyat mudirligiga o‘tkazilgan.
Oldinroq Karmana tumani XTB mutasaddilari Xalq ta’limi vazirligining bayonotiga zid ravishda chet tili o‘qituvchilariga tarqatilayotgan 1 mln so‘m mablag‘ni naqd ko‘rinishida berib, bozor narxi 60 ming so‘m bo‘lgan kitobni 483 ming so‘mdan pullamoqchi bo‘lgandi.
Kun.uz surishtiruvidan so‘ng Xalq ta’limi vazirligi tomonidan holat o‘rganilib, ma’lumotlar o‘z tasdig‘ini topgan hamda buning ortidan XTB mudiri Nasiba Sodiqova, metodist va bosh hisobchi egallab turgan lavozimlaridan ozod etilgandi.
