CNN: AQSh ittifoqchilar bilan Sharqiy Yevropaning uch davlatiga uch ming harbiy tashlashni muhokama qilmoqda

AQSh va ittifoqchilar Rossiyaning Ukrainaga bostirib kirishi tahdidi tufayli Sharqiy Yevropa mamlakatlariga qo‘shimcha harbiy kontingent jo‘natish masalasini muhokama qilmoqda. Bu haqda CNN vaziyatdan xabardor bo‘lgan manbalariga asoslanib xabar tarqatdi.

Taxminlarga ko‘ra, harbiylar Bolgariya, Ruminiya va Vengriyaga jo‘natiladi — bu davlatlarning har biriga mingtadan.

23 yanvar kuni The New York Times gazetasi, AQSh mudofaa vazirligi prezident Jo Baydenga Sharqiy Yevropa hududiga besh minggacha harbiy jo‘natish, zarurat tug‘ilgan holatda bu miqdorni o‘n barobarga oshirish bo‘yicha taklif bergani haqida xabar tarqatgandi.

Pentagon rasmiy vakili Jon Kirbi keyinroq AQSh 8,5 ming harbiy xizmatchini jangovar shay holatga keltirgani haqida ma’lum qilgandi. Aynan ular yaqin vaqt ichida Yevropaga yo‘l olishi mumkin.

• NATO mamlakatlari rossiyalik harbiylar Ukraina chegaralari tomon surilayotgani tufayli Sharqiy Yevropaga qo‘shimcha kuchlar joylashtirish imkoniyatlarini muhokama qilmoqda. Bundan tashqari, Rossiya Belarusda qo‘shma mashg‘ulotlar o‘tkazmoqda. Rossiya hukumati Ukrainaga hujum qilishga tayyorlanmayotganini aytib, harbiylarini o‘z hududida erkin harakatlantirish huquqiga egaligini iddao qilmoqda.
• «Yedinaya Rossiya» partiyasi fraksiyasi yetakchisi 26 yanvar kuni mamlakat rahbariyatiga murojaat qilib, tan olinmagan Donetsk va Lugansk xalq respublikalariga qurol yetkazib berishni so‘radi. Partiyadagilar Ukraina DXR va LXRga hujum qilishga tayyorlanmoqda deb hisoblamoqda.