«Jamoalardan pul oladigan emas, ularga pul beradigan tashkilotga aylanishimiz kerak» – PFL ilk bor moliyaviy hisobot topshirdi

«Bu yil PFL badal pullaridan 6 mlrd 300 mln, legionerlar uchun to‘lovdan 2 mlrd 520 mln, tartib-intizom jarimalaridan 494 mln 500 ming, homiylardan 9 mlrd 280 mln – jami 15 mlrd 725 mln so‘m pul topdi. Hakamlar, komissarlar, inspektorlar, ishchi-xodimlar, to‘plar, VAR, musobaqalar o‘tkazish, taqdirlash marosimlari,auditor tekshiruvi, COVID tekshiruvi, futbolchilarni sug‘urtalash va statistika kabi xarajatlar esa jami 16 mlrd 618 mlnni tashkil etdi.

Yil avvalida Superliga uchun badal pulini 500 mln so‘mdan 350 mlnga tushirdik. Pro liga va Birinchi liga uchun to‘lovlarni 50 foizga kamaytirdik. Tarixda birinchi marta ayollar futboli va futzal uchun badal pullaridan voz kechdik. Legionerlar uchun to‘lovni 40 mln so‘mga tushirdik. Agar xorijlik futbolchi O‘zbekistonda ikkinchi mavsumini o‘tkazayotgan bo‘lsa, bu qiymat 50 foizga qisqaradi. 5 yildan buyon O‘zbekistonda o‘ynayotgan legionerlardan esa pul olinmaydi.

Bu yildan tartib-intizom jarimalarini O‘FAga bolalar futbolini rivojlantirish uchun o‘tkazib beramiz. Yaqin kelajakda «Studens Cup» (Talabalar Kubogi) tashkil etmoqchimiz. Chet elda universitetlarda futbol bo‘yicha talabalar jamoasi bor va ular hatto kubok bahslarida grand jamoalar bilan to‘qnash kelib, yaxshigina pul ishlashadi. Futbolchi bo‘lishni istagan, ammo ota-onasi sabab o‘qish yo‘lini tanlagan yoshlar uchun ajoyib imkoniyat yuzaga keladi. 

Eng asosiy yutuqlarimizdan biri – klublarimizni hakamlarning bordi-keldisi va yashashi uchun to‘lovlardan qutqardik. Avval jamoalardan pul olmaydigan tashkilotga aylanib olishimiz kerak, so‘ng, aksincha, ularga pul berishga harakat qilamiz.

OFKning litsenziyalash talabini 12ta klubimiz bajardi, bu yil shuni 16taga olib chiqmoqchimiz. OFK litsenziyasini olmagan Superliga klublarini Pro Ligaga tushirib yuboramiz. Yaponiyadan o‘rnak olishimiz kerak: 54ta klubi litsenziya oldi. Bu – ular uchun odatiy hol.

Sug‘urtalash masalasiga ham jiddiy ahamiyat berdik. Esingizda bo‘lsa, «Dinamo»  yarimhimoyachisi Sirojiddin Sayfiyev jiddiy jarohat olib, faoliyatini yakunlagan. So‘ng o‘sha jarohat tufayli rak bo‘ldi va vafot etdi. Bilasizlarmi, o‘sha Sayfiyevning sug‘urtasi bint puliga to‘g‘ri kelgan. Ya’ni, sug‘urtalashga e’tibor berilmagan. Klublar jarohat olgan o‘yinchisini kasalxonaga tashlab ketavergan. Biz hozir APEX`dan pul olamiz va har bir futbolchimizni sug‘urtalaymiz. Kompaniya jiddiy jarohat uchun futbolchiga 35 mln so‘m beradi. 

Futbolchilarning statistikasini nazorat qilib boryapmiz. Mana yaqinda «Navbahor»  Catapult (futbolchilarning funksional holatini masofadan turib monitoring qilishga yordam imkon beruvchi moslama) oldi. «Paxtakor»  Arveladze paytidan beri ishlatadi. Lekin bizning ayrim «buyuk» murabbiylarimiz milliy jamoada ham undan foydalanmagan. Aqlli murabbiylar bundan foydalanadi. Buni kiygan futbolchilar murabbiyni alday olmaydi. Futbolchi qancha yuguryapti, pulsi nechta uryapti, necha daqiqaga chidaydi – texnika hammasini belgilab beradi».

Anjumanning ikkinchi qismida Imomxo‘jayev jurnalistlarning Superliga formati, OChLing kuz-bahor tizimia o‘tishi ehtimoli, jamoalardagi muammolar borasidagi savollariga javob berdi.

«Superliga formati? 12tadan jamoa qatnashadiga ikkita ligani xohlaganmiz. Ammo buning uchun yetarli jamoa bo‘lishi kerak. 12ta klubimiz litsenziya olgani – 12ta yaroqli jamoa bor degani. Lekin sport prinsiplariga zid borib 14ta klub bilan Superliga qildik. Afsuski, futbol faqat uning rivojini o‘ylaydigan kishilardan iborat emas.

«Mana Superligamizning ahvoli», – deb yozishadi. Bunga 90 foiz jamoalar aybdor. Jamoa bor, klub yo‘q. Muammoli klublarga e’tibor bersangiz, 10 yildan beri o‘sha-o‘sha. «Navbahor»  3 yilda qanchalik o‘sdi? Juda ko‘p yuridik ishlarda qatnashdi va saboq oldi. Klublar professionallik darajasini oshirishi kerak. Biz har bir klubning ichki ishlariga aralasha olmaymiz.

OChLning kuz-bahor tizimiga o‘tishi? Avvalo, bu rasman e’lon qilinmadi. Bu katta ehtimol bilan faqat ushbu mavsumga aloqador. Mabodo shunday bo‘lgan taqdirda ham, bundan fojia yasamaslik kerak. Arab jamoalari 20 yil o‘ziga noqulay vaqtda o‘ynadi, lekin «Al Ittihod», «As Sadd», «Al Hilol» lar chempion bo‘ldi-ku. Xuddi avval chempion bo‘lib yurgandek, kuz-bahor tizimidan bahona qidirish to‘g‘ri emas. Maqsadimiz Osiyo jamoalarini yutish emas, Eldor Shomurodovdek futbolchilarni tarbiyalash bo‘lishi kerak.       

Futbol markazlashayotgani? Buni sun’iy tartibga solish to‘g‘ri emas. Odamlar «Hamma viloyatdan jamoa bo‘lishi kerak» , – deydi, lekin prinsip-chi? Angliyada Londondan jamoalar ko‘p, hech kim indamaydi.

Masalan, «Surxon»  Toshkentda yashab, shu yerda mashg‘ulot o‘tkazadi. Hatto o‘yinlarni ham shu yerda o‘tkazmoqchi bo‘ldi. Lekin biz rozi bo‘lmadik. Chunki bu – surxondaryolik muxlislarga hurmatsizlik. Jamoaning yoshlari asosiy tarkib mashg‘ulotlarini ko‘rishi, o‘rganishi kerak. Talabimiz tufayli jamoaning hozirgi rahbarlari stadionni rekonstruksiya qilishmoqchi».

A’zamjon Izzatillayev tayyorladi,

Tasvirchi va montaj ustasi – Azimjon Vohidov