Diyor Imomxo‘jayev yana 4 yil muddatga O‘zbekiston Professional futbol ligasi direktori etib tasdiqlandi. Bu haqda liga matbuot xizmati xabar qildi.
Qayd etilishicha, 17-avgust kuni O‘zbekiston futbol assotsiatsiya prezidenti Bahodir Qurbonov tomonidan imzolangan taqdimnoma liga Ijroiya qo‘mitasiga yuborilgan va unda liga bosh direktori lavozimi uchun Diyor Imomxo‘jayev nomzodi ilgari surilgan.
19-avgust kuni Ijroiya qo‘mitaning 8 nafar a’zosi mazkur masalani ko‘rib chiqdi. Yig‘ilish yakuniga ko‘ra, Ijroiya qo‘mitaning barcha a’zolari bir ovozdan Diyor Imomxo‘jayev nomzodini navbatdagi vakolat muddatiga bosh direktor sifatida tasdiqladi.
Tashkilotning amaldagi rahbari 2026-yilning 19-avgust sanasidan e’tiboran keyingi 4 yil davomida o‘z vazifasini bajarishda davom etadigan bo‘ldi.
Ma’lumot uchun, asli sport jurnalisti hisoblangan Diyor Imomxo‘jayev 2020-yildan e’tiboran liga bosh direktori vazifasini bajaruvchisi, 2022-yildan esa bosh direktori sifatida ishlab kelmoqda.
