Bugun, 23 fevral kuni jinoyat ishlari bo‘yicha Mirzo Ulug‘bek tuman sudida 1999 yil 16 fevralda Toshkentda yuz bergan qo‘poruvchilik harakatlarida ishtirok etgan sudlanuvchi J.Yu.ga hukm e’lon qilindi. Bu haqda Toshkent shahar sudi matbuot xizmati xabar berdi.
Sudya B.Berdiyev tomonidan e’lon qilingan hukmga ko‘ra, J.Yu. Jinoyat kodeksining 155-moddasi (terrorizm), 159-moddasi (konstitutsiyaviy tuzumga tajovuz qilish), 161-moddasi (qo‘poruvchilik), 164-moddasi (bosqinchilik), 223-moddasi (qonunga xilof ravishda chet elga chiqish yoki O‘zbekiston Respublikasiga kirish), 242-moddasi (jinoiy uyushma tashkil etish) hamda 244-2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish)da nazarda tutilgan jinoyatlarni sodir etganlikda aybdor deb topilgan hamda unga uzil-kesil o‘tash uchun 20 yil muddatga ozodlikdan mahrum qilish jazosi tayinlandi.
Joriy yil 14 yanvar kuni Davlat xavfsizlik xizmati O‘zbekiston hududida terroristik jinoyatlarni sodir etganligi uchun 23 yildan buyon qidiruvda bo‘lgan U.S. xorijda ushlanib, mamlakatga olib kelinganini xabar qilgan edi.
