Marg‘ilonda Shveytsariya tibbiyot va axborot texnologiyalari universiteti tashkil etiladi

Vazirlar Mahkamasining “Marg‘ilon shahrida Shveytsariya tibbiyot va axborot texnologiyalari universitetini tashkil etish to‘g‘risida”gi qarori loyihasi e’lon qilindi.

Farg‘ona viloyati hokimligining Marg‘ilon shahrida Shveytsariya tibbiyot va axborot texnologiyalari universitetini (Swiss Medical and Information Technologies University) tashkil etish to‘g‘risidagi taklifi ma’qullanadi.

Farg‘ona viloyati hokimligi tomonidan universitet bino va inshootlarini qurish, rekonstruksiya qilish, kapital ta’mirlash, jihozlash hamda internet orqali o‘qitish tizimi moddiy-texnik ta’minoti amalga oshiriladi.
 
Quyidagilar universitetning asosiy vazifalari va faoliyat yo‘nalishlari etib belgilanadi:

universitetda O‘zbekiston oliy ta’lim dasturlari bilan birga dunyoning nufuzli xorijiy oliy ta’lim muassasalari oliy ta’lim dasturlarini joriy etish;

• respublika iqtisodiyoti real sektorlari tarmoqlari ehtiyojlarini hisobga olgan holda yuqori malakali oliy ma’lumotli mutaxassislarni tayyorlash;
• xorijning ilg‘or oliy ta’lim muassasalari bilan hamkorlik asosida tajriba almashish dasturlarini amalga oshirish;
• o‘quv rejalariga zamonaviy fanlarni kiritib borish, innovatsion hamda ilm-fanga asoslangan texnologiyalarni tatbiq qilish;
• ta’lim jarayoniga yetakchi xorijiy oliy ta’lim muassasalarining malakali professor-o‘qituvchilari, olim va mutaxassislarini keng jalb qilish;
• ta’lim jarayoniga zamonaviy pedagogik va axborot-kommunikatsiya texnologiyalarini, ilm-fan va texnikaning yangi yutuqlarini joriy etish;
• professor-o‘qituvchilar malakasini oshirish va qayta tayyorlash, shu jumladan ularning stajirovkasini nufuzli xorijiy oliy ta’lim va ilmiy-tadqiqot muassasalarida tashkil etish.

Belgilanishicha:

• universitet ta’lim jarayonini Oliy va o‘rta maxsus ta’lim vazirligi bilan kelishilgan holda xorijiy tajriba asosida ishlab chiqilgan malaka talablari, o‘quv reja va fan dasturlari asosida amalga oshiradi;
• universitetda o‘qitish O‘zbekistonda amalda mavjud ta’lim shakllari, o‘zbek va ingliz tillarida grant hamda to‘lov-kontrakt asosida amalga oshiriladi;
• bakalavr, magistratura va doktorantura ta’lim darajalariga qabul parametrlari respublika mehnat bozori ehtiyojlari hamda universitet moddiy-texnik imkoniyatidan kelib chiqqan holda, universitet tomonidan Oliy ta’lim vazirligi bilan kelishilgan holda belgilanadi;
• universitetda ta’lim faoliyati 2022/2023 o‘quv yilidan boshlanadi;
• universitet bitiruvchilariga O‘zbekistonda oliy ma’lumot to‘g‘risidagi hujjat sifatida tan olinadigan belgilangan namunadagi diplom beriladi.