Sirdaryoda Cobalt’ga 1 256 kg iste’molga yaroqsiz go‘sht ortgan qashqadaryolik haydovchi to‘xtatib qolindi

IIV YHXBB axborot xizmatining xabar berishicha, 2022 yil 15 mart kuni Sirdaryo viloyatidagi muntazam post-patrul maskanlaridan birida Qashqadaryo-Toshkent yo‘nalishida harakatlanib kelayotgan Cobalt mashinasi to‘xtatilganda haydovchida tegishli hujjatlar yo‘qligi ma’lum bo‘ladi.

Shundan so‘ng mashina yukxonasi va saloni tekshirib ko‘rilganda u yerda 1 tonna 256 kilogramm noma’lum hayvon go‘shti borligi aniqlanadi.

Cobalt’ga ortilgan go‘sht viloyat hayvonlar kasalliklari tashxisi va oziq-ovqat xavfsizligi davlat markazida laboratoriya teshiruvidan o‘tkazilganda iste’molga yaroqsiz ekani ma’lum bo‘ladi.

Dastlabki surishtiruvda haydovchi mashina va unga ortilgan go‘sht o‘ziga tegishli emasligini aytgan.

Qayd etilishicha, holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, hozirda surishtiruv harakatlari olib borilmoqda.

Avvalroq Qashqadaryo viloyatida joylashgan «Umakay» muntazam YPX maskanida Nexia mashinasi bilan Toshkentga olib ketilayotgan 900 kilogramm iste’molga yaroqsiz go‘sht to‘xtatib qolingandi.