Pentagon: Ukrainaga Switchblade kamikadze-dronlari yetkazib berildi

Ma’lum qilinishicha, dastlabki 100ta dronning bir qismi Ukrainaga yetib bordi.

Foto: AeroVironment

Pentagon matbuot kotibi Jon Kirbi AQSh Ukrainaga Switchblade kamikadze-dronlarini yetkazib berganini ma’lum qildi.

«Dastlabki 100ta dron jo‘natildi. Ularning bir qismi allaqachon Ukrainaga yetib bordi. Qolganlarini yetkazib berish ham ko‘p vaqtni olmaydi», — dedi Kirbi.

U AQSh prezidenti Jo Bayden hukumat Ukrainaga o‘zini himoya qilishi uchun yordam berish yo‘llarini qidirishda davom etishini aytganini eslatib o‘tdi.

«Shu bois kelgusida ham bunday tizimlar yetkazilishini istisno qilmayman», — dedi Kirbi.

Avvalroq Bayden AQSh Ukrainaga qo‘shimcha 800 mln dollar ajratilishi va 800 dona Stinger zenit-raketa majmualari hamda 2 ming dona Javelin tankka qarshi tizimlarini yetkazib berishini aytgandi.