Foto: Samarqand shahridagi markaziy ko‘chada sodir bo‘lgan yong‘in o‘chirildi

Samarqand shahridagi Mirzo Ulug‘bek ko‘chasida joylashgan maishiy xizmat ko‘rsatuv do‘konlarida yong‘in sodir bo‘lgandi. Shahar markazida sodir bo‘lgan yong‘in ikki soat ichida bartaraf etildi.

FVV Samarqand viloyati boshqarmasining ma’lum qilishicha, soat 14:00 da Mirzo Ulug‘bek ko‘chasidagi binolarda yong‘in sodir bo‘layotgani haqida xabar kelib tushgan va qutqaruvchilar 3 daqiqa ichida voqea joyiga yetib borgan. Soat 16:20 da yong‘in o‘chirilgan. Binolarning 200 kvadrat metr atrofida tom va shift qismi yongan.

Yong‘inni o‘chirish uchun 8 ta o‘t o‘chiruvchi texnika, 50 nafarga yaqin o‘t o‘chiruvchi jalb etilgan. Shuningdek, FVV tizimidagi boshqa turdagi texnikalar, Obodonlashtirish boshqarmasiga tegishli suv tashuvchi texnikalar jalb qilindi. Yong‘in kuchaygan vaqtda bir muddat Mirzo Ulug‘bek ko‘chasi avtomobillar harakati uchun vaqtincha yopildi. Yong‘in Samarqandning serqatnov va gavjum ko‘chasida sodir bo‘lgani uchun ko‘plab IIB hamda Milliy gvardiya xodimlari atrofdagi xavfsizlikni ta’minlash uchun safarbar qilindi.

FVV Samarqand viloyat bosharmasi axborot xizmati rahbari Ilhom Boqiyev Kun.uz bilan suhbatda yong‘in qisqa tutashuv oqibatida chiqqanini aytdi.