Qabul-2022: Abituriyentlar ro‘yxatdan o‘tishda ta’lim yo‘nalishlarini tanlashi mumkin bo‘ldi

OTMlarga qabul 20 iyundan boshlangan bo‘lsa-da, bungacha abituriyentlar faqat o‘zlariga tegishli ma’lumotlar asosida ro‘yxatdan o‘tishi mumkin edi. Endi ta’lim yo‘nalishlari, ta’lim shaklini tanlash imkoni ham yaratildi.

Abituriyentlarni ro‘yxatga olish Davlat test markazining my.dtm.uz sayti va Yagona interaktiv davlat xizmatlari portali (my.gov.uz) orqali onlayn amalga oshirilmoqda.

Bu yilgi qabulda abituriyentlar 5 tagacha OTM va yo‘nalish tanlashi, grant ustuvorligini belgilashlari mumkin. Yana asosiy yangiliklardan biri abituriyentlarga turli ta’lim shakllari: kunduzgi, kechki, sirtqi va masofaviy ta’lim shakllarini bir paytning o‘zida tanlash imkoni ham berildi.

Eslatib o‘tamiz, OTMlarga qabul 20 iyulgacha, chet tilidan kasbiy (ijodiy) imtihon o‘tkaziladigan bakalavriat ta’lim yo‘nalishlariga qabul esa 10 iyulgacha bo‘lib o‘tadi.