Shri-Lankadagi namoyishlar fonida bosh vazir iste’foga chiqadigan bo‘ldi

Shri-Lanka bosh vaziri Ranil Vikremesingxe iste’foga chiqishini ma’lum qildi.

"Hukumat o‘z ishini davom ettirishini hamda barcha fuqarolar xavfsizligini ta’minlash maqsadida partiya yetakchilarining tavsiyasini qabul qilaman. Bosh vazir lavozimidan iste’foga chiqaman", - deb yozdi Vikremesingxe Twitter akkauntida.

Kolomboda 9 iyul, shanba kuni Shri-Lanka prezidenti Gotabaya Rajapaksadan o‘z lavozimini tark etishni talab qilgan bir guruh namoyishchilar uning qarorgohiga bostirib kirdi. Reuters xabariga ko‘ra, minglab namoyishchilar politsiya barrikadalarini buzib o‘tgan, ularning bir qismi binoga kirgan.

Prezident evakuatsiya qilingan va OAV xabar qilishicha, Shri-Lankani tark etgan bo‘lishi mumkin.

Shri-Lanka iqtisodiy inqiroz holatida bo‘lib turibdi. Hukumat oziq-ovqat, yonilg‘i va dori-darmonlar kabi muhim import tovarlarni moliyalashtira olmayapti. Mamlakat tashqi qarzi 51 milliard dollarni tashkil etadi.