Rossiyada deputat Ilya Yashinga qarshi armiya haqidagi «feyklar» bo‘yicha ish qo‘zg‘atildi

RTQ bosh tergov boshqarmasi Moskvadagi Krasnoselskiy munitsipal okrugi deputati Ilya Yashinga nisbatan Rossiya armiyasi haqidagi «feyklar» (Jinoyat kodeksining 207.3-moddasi) bo‘yicha jinoiy ish qo‘zg‘atdi. Bu haqda advokat Vadim Proxorov 12 iyul, seshanba kuni Facebook’da yozdi. 

«Hozir tergovchi menga qo‘ng‘iroq qildi - uning uyida tintuv boshlanyapti. Men o‘sha joyga boraman», - dedi himoyachi. 

Keyinroq Proxorov Facebook’dagi postini yangilab, tintuv yakuniga ko‘ra faqat «eski Nokia telefoni» musodara qilinganini qo‘shimcha qildi: «Boshqa hech narsa topilmadi». Advokatning «Interfaks»ga ma’lum qilishicha, tintuvdan so‘ng Yashin Rossiya Qurolli kuchlaridan foydalanish to‘g‘risida yolg‘on ma’lumot tarqatish haqidagi moddani buzganlikda ayblanib, Tergov qo‘mitasiga so‘roqqa olib ketilgan. Sababi - «7 aprel kuni u o‘zining yutub-kanalida Buchada sodir bo‘lgan voqealar haqida jonli efirda gapirgan». Ushbu moddadagi jazo 10 yilgacha ozodlikdan mahrum qilishni nazarda tutadi. 

Siyosatchiga 13 iyul kuni ayblov e’lon qilinadi, deya ta’kidlaydi inson huquqlari bo‘yicha «OVD-Info» loyihasi advokat Mixail Biryukovga tayanib. Unga ko‘ra, kunning ikkinchi yarmida Basmanniy sudida ehtiyot chorasini tanlash bo‘yicha yig‘ilish o‘tkaziladi. 

Ilya Yashin 28 iyun kuni politsiyaga bo‘ysunmaslik moddasi bo‘yicha hibsga olingan, u 15 kunga qamalgan. Bu muddat 13 iyulga o‘tar kechasi, u tergov izolyatorini tark etishi kerak bo‘lgan vaqtda tugaydi.