Pentagon: Ukrainada 80 mingga yaqin rus askari o‘ldirilgan yoki yaralangan

Ukrainada urush boshlanganidan buyon 70 mingdan 80 minggacha rossiyalik harbiylar halok bo‘lgan yoki yaralangan. Bu haqda 8 avgust, dushanba kuni AQSh mudofaa vaziri o‘rinbosari Kolin Koul jurnalistlarga ma’lum qilib, gap jang maydonida halok bo‘lgan va yarador bo‘lgan taxminiy yo‘qotishlar haqida ketayotganini ta’kidladi. «Bu ko‘rsatkich biroz pastroq yoki biroz yuqoriroq bo‘lishi mumkin, ammo haqiqiy raqamlar shu atrofida», dedi u. 

Shu bilan birga, Pentagon vakilining qayd etishicha, bunday «jiddiy» yo‘qotishlarga qaramay, Rossiya fevral oyi oxirida Ukrainaga bostirib kirish chog‘ida prezident Vladimir Putin e’lon qilgan maqsadlardan birortasiga ham erisha olmagan. «Uning asosiy maqsadi butun mamlakatni qo‘lga kiritish, Kiyevda hokimiyatni almashtirish va Ukrainani mustaqil, suveren hamda demokratik davlat sifatida yo‘q qilish edi. Bularning hech biri sodir bo‘lmadi», - deya ta’kidladi Koul. U Ukraina tomoni ham katta yo‘qotishlarga uchraganini tan oldi, biroq hech qanday raqam keltirmadi. 

Moskva va Kiyev urushda halok bo‘lganlar sonini oshkor etmayapti. RF Mudofaa vazirligi ular haqida oxirgi marta 25 mart kuni xabar bergandi. O‘shanda 1351 kishi halok bo‘lgani va 3825 kishi jarohatlangani e’lon qilingan. Davlat dumasi mudofaa qo‘mitasi raisi Andrey Kartapolov iyun oyi boshida Rossiya Ukrainada harbiy harakatlar olib borishga yondashuvini o‘zgartirib, harbiy xizmatchilarni yo‘qotishni amalda to‘xtatganini aytdi. 

Koul Rossiya tomonidan boshlangan urushni «Ikkinchi jahon urushidan beri oddiy qurollardan foydalangan holda Yevropada kuzatilayotgan eng kuchli to‘qnashuv» deb ta’rifladi. Hozirda u ustunlikni ukrainaliklar tomonida ko‘rmoqda. Uning fikricha, UQK ruhiy va jangovar tayyorgarlik bo‘yicha ruslardan ustundir. Ukrainaliklar uchun «ko‘p narsa xavf ostida. Ular o‘z mamlakatlari omon qolishi uchun kurashmoqda», - dedi Pentagon rasmiysi.