Mikrohududdan tashqaridagi maktabga qabul uchun ariza yuborish 30 avgustgacha davom etadi

Elektron qabul jarayonlari o‘tkazilayotgan hududlarda jami 80 ming nafardan ortiq bolalar my.maktab.uz platformasi orqali maktablarga onlayn tarzda qabul qilindi.  

Xalq ta’limi vazirligi xabariga ko‘ra, 20 iyundan 31 iyulga qadar ota-onalar tomonidan biriktirilgan mikrohudud bo‘yicha onlayn yuborilgan 55 049 ta arizalar maktablar tomonidan qabul qilindi. 

1 avgustdan boshlab farzandlarini 1-sinfga joylashtirish uchun my.maktab.uz elektron platformasi orqali ota-onalarga mikrohududdan tashqari bo‘sh o‘rinlar bo‘yicha qo‘shimcha ariza topshirish boshlandi.

O‘n besh kunda (1-15 avgust kuni) mikrohududdan tashqari bo‘sh o‘rinlar bo‘yicha ota-onalar tomonidan 34 206 ta arizalar qabul qilindi. Topshirilgan arizalar bo‘yicha 31 799 nafar o‘quvchilar 1-sinfga qabul qilindi va 2407 nafar ota-onalar onlayn navbat asosida umumta’lim maktablariga borishlari kutilmoqda.

Mikrohududdan tashqari qabul uchun arizalar yuborish joriy yil 30 avgustiga qadar davom etadi. 16 avgustdan boshlab Toshkent shahri va viloyat markazlaridan tashqari boshqa hududda istiqomat qiluvchi fuqarolarga mikrohududdan tashqari qabul uchun ariza yuborish jarayoni ishga tushirildi.