Poytaxtdagi Tashkent City Congress Hall majmuasida parlamentlararo ittifoqqa a’zo davlatlar parlamentlari ayol rahbarlari 14-sammiti o‘z ishini boshladi, deb xabar bermoqda “Dunyo”.
Sammit 8-9 sentabr kunlari “Parlament yetakchi roli: yanada samarali barqarorlik va farovonlikni ta’minlashda xavf-xatarni baholash” mavzusida bo‘lib o‘tmoqda. Forumda BMT, parlamentlararo ittifoq, Yevropada xavfsizlik va hamkorlik tashkiloti parlamentlararo assambleyasi, MDH parlamentlararo assambleyasi rahbarlari, 17 ta davlat parlamentlari 120 dan ortiq vakillari ishtirok etmoqda.
Sammitda parlamentlar oldidagi ustuvor vazifalar va pandemiya sababli yuzaga kelgan inqiroz jarayonlarida gender tengligini kafolatlash, barqaror rivojlanish va farovonlikni ta’minlash, ayollar iqtisodiyot tiklanishidagi imkoniyatlarini kengaytirish sohalaridagi harakat yo‘nalishlari muhokama qilinadi.
Parlamentlararo ittifoqqa a’zo davlatlar parlamentlari ayol rahbarlari 14-sammitini O‘zbekiston Senati raisi Tanzila Norboyeva ochdi. Tadbir avvalida davlat rahbari matbuot kotibi Sherzod Asadov prezident Shavkat Mirziyoyevning xalqaro forum ishtirokchilariga yo‘llagan murojaatini o‘qib eshittirdi.
Parlamentlararo ittifoq 200 ga yaqin mamlakat parlamentlarini birlashtiradi va muloqot uchun eng yirik platforma hisoblanadi. O‘tgan yili Venada bo‘lib o‘tgan parlamentlararo ittifoqqa a’zo davlatlar parlamentlari ayol rahbarlari sammitida navbatdagi anjumanni O‘zbekistonda o‘tkazishga qaror qilingandi.
